uMthunywa
Silo Charles Dube
Lwalotshwa ngunguBernard D Ndlovu
Kuviki edlulileyo sitshiye uSehliselo ecunulwa ngunina uMaMbambo othi nxa esezondile akhulume kubi ngesisu sakhe kanti yena wayake athabe ukuthi useza zuza umzukulu. Wayekubiza ngamagama amabi uMaMbambo ethi kuzathiwani okuyisibungwana lokho? Lokhu kwakusenza uSehliselo afikelwe ngumkhumbulo omubi afise ukusinyomula leso sisu.
Uzinikela lekufeni uSehliselo. Lokhu kuvela sobala nxa etshela umngane wakhe uQakisiwe ethi siyamhlupha leso sisu kanti lonina uphatheke kubi ngaso.
Uthi nxa sibulala umngane wakhe kayekele simbulale, okungasikufa yikuphi? Injalo inhliziyo yomuntu nxa isizikele ebubini. UQakisiwe lanxa laye ephila ngokwenza okubi, ulenhlansanya yokulunga. Uxwayisa umngane wakhe uSehliselo ukuthi lokho akuqalwa uzakufa ehawula.
UQakisiwe utshela uSehliselo ukuba kulendlela elula kakhulu engasoze imzwise ubuhlungu kumbe into yenkosi engelacala engasinda ngayo.
Njalo uthi kasoze abelesono kuNkulunkulu. Kasicebo elihle leli elilethwa nguQakisiwe kuSehliselo, kodwa uSehliselo uyathatheka ngalo.
Uveza ingwabungwabu enkulu uSehliselo ethi uQakisiwe kamtshele bo, futhi nxa engamngcothula kulinkinga engamenzela into enhle okwamagama. UQakisiwe uthi yindaba ake amtshela ngayo engakholwa.
UQakisiwe ukhumbuza uSehliselo ngodadewabo uThibile owendele eMasvingo. Umtshela ukuthi nguye lowo dadewabo ofuna umntwana ngamehlo abomvu.
Bahluphana kakhulu lomkakhe olisotsha ngendaba yokuswela umntwana. Kuminyaka emibili edlulileyo baphosa behlukana bebanga khonokho ukungabi lomntwana.
Uyaphambili uQakisiwe ethi udadewabo uyamthanda kakhulu umkakhe okokuthi kungamdabula kakhulu uma bengehlukana.
Icebo elicatshangwa lapha libi kakhulu, okokuthi sixwayisa abesintwana ukuthi bangalilandeli balithathe njengento ekhulunywa ngabalingisi ingamelanga yenziwe emhlabeni.
UQakisiwe uthi udadewabo lowo ukhona kulezinsuku, ukuyisekazi eWaterford. Kuthiwa watshela umkakhe amanga ukuthi ulesisu. Umkakhe kwamthabisa kakhulu lokho.
Inyanga yokubeletha kukadadewabo kaQakisiwe ihambelana xathu lekaSehliselo okokuthi icebo labo lalizasebenza kuhle.
Ububi lobu sebukebazanywa ngomunye umama, kodwa kukhanya umuntu owayethembise ukupha udadewabo kaQakisiwe umntwana kasezwakali, kungani usetshedela emuva.
Kwamthabisa kakhulu uSehliselo ukuzwa icebo lelo. UQakisiwe uyazi ukuthi into le kayilunganga yikho ebamba uSehliselo umlomo osejabula kakhulu engakezwa isiphetho sodaba.
Uthi into le akumelanga bayenze ngobuphukuphuku.
Bangayenza ngobuphukuphuku linto ingabafaka emanyaleni, njalo akumelanga uMaMbambo, unina kaSehliselo ayazi kumbe anakanele.
UQakisiwe unika uSehliselo icebo okumele alenze. Hlala lathi ukuze uzwe lelo cebo likaQakisiwe.
