uMthunywa
Thando Dube
KULENINA leDulibadzimu eBeitbridge eselimangaze izihlobo zalo ngokuthandana lomfana olingana lezibulo lalo.
Kubikwa uRhoda Banda oleminyaka engu-42 uthandana loSamuel Moyo oleminyaka engu-22 yokuzalwa okuyinto esikhathaza izihlobo zakhe ngoba lkasanakekeli abantwabakhe.
Ekhuluma loMthunywa omunye olilunga lemuli yakoBanda ongathandanga ukuqanjwa ngebizo uthe uRhoda wenza into elihlazo.
“Okwenziwa nguRhoda kulihlazo sibili njalo kusikhipha isithunzi lapha esigabeni.Kambe umuntu angathi ekhulile ayethandana lomfayana nje olingana lezibulo lakhe.
“Umfana lo athandana laye kasebenzi, udla imali kaRhoda. Uhlupho osolukhona yikuthi kasanakekeli abantwabakhe ngoba zonke izinto seziphiwa umfana lo. Umfana lo esingazi ukuthi ngowangaphi nguye osezenza ubaba wendlu.
“Kwamanye amalanga batshona bezikhiyele ekamelweni lokulala uzibuze ukuthi abantwana abaya esikolo bona uRhoda uke wabakhangela yini.
“Nxa abantwana bezama ukumcebisa ubathembisa ukubaxotsha emzini wakhe njalo bayatshelwa ukuthi kufanele bambize baba. Kakwazi ukuthi okungumfana lokhu kuzadlala ngaye kuphinde kumtshiye egcekeni,” kuchaza lesisihlobo.
Uphinde wathi izihlobo zomkakhe wakuqala zike zazama ukumkhuza kwehlula.
“Izihlobo zomkakhe wakuqala zike zazama ukukhulumisana laye ngodaba lokungasanakekeli abantwana waziphendula ngokuthi yena emzini wakhe uvunyelwe ukwenza akufunayo njalo nxa besola isiphatho sakhe kabathathe abantwababo,” kuchaza lesisihlobo.
UMthunywa ukhulumisane loRhoda yena othe uvunyelwa ukuthandana laloba ngubani amfunayo.
“Ngingumuntu omdala, ngiyavunyelwa ukuthandana laloba ngubani engimkhethileyo. Abakusolayo lokhu ngokwabo,” kuphetha uRhoda.
