uMthunywa
Thando Dube
IPHOSE yasala isiyinkabi enye indoda yeMberengwa nanko phela unina uyijwamule amaphambili wathula wathi zwi embambile kubangwa ilifa.
Isiga lesi esitshiye uEnock Shumba ethoba amaphambili senzakale kuviki ephelileyo lapho imuli yakoShumba akade ihlangene khona kusabiwa ilifa likayise.
Kubikwa uNkosazana Stella Chirwa waba lokungazwani lendodana endala lomkayo kubangwa ilifa okuyikho okwabangela ukuthi uNkszn Chirwa ambambe amaphambili.
UMthunywa ukhulumisane loMnumzana Lazarus Shumba ilunga lemuli akade likhona kusenzakala lokhu yena othe kube lobunzima ukulamula inina leli lendodana yalo.
“Kubenzimna ukulamula laba ababili ngoba uMaChirwa ubefuna ukuwahluthuna amaphambili omntanakhe ngoba ubembambe okwepitshisi njalo ubengafuni lokumekela.
“UEnock uqale esaqinisela esabhonga wacina esehlaba umkhosi esebona ukuthi angasala engaseyiyo ndoda yalutho.
“Sibona lokhu sizame ukumdonsa uMaChirwa ukuthi ekele umntwana kodwa ubesengani ungenwe lidimoni. Uze wamekela sedonswa ngabantu abathathu yikho ukuthi amekele.
UMthunywa uphinde wakhulumisana loMaChirwa oveze ukuthi imbangela yengxabano yabo yikuthi uEnock umbangisa ilifa elatshiyelwa ngumkakhe.
“UEnock kazalwa yimi mhlawumbe yikho engangihloniphi, ukumbamba ngimbambile sibili amaphambili ngoba bengifuna ukumfundisa umthetho njalo lokuthi akwazi ukuthi lelifa ngelami ngilitshiyelwe ngumkami.
“Umntwana nxa engabuya kimi njengonina acele usizo ngeke ngimlahle kodwa nxa sefuna ukungibangisa athathe ngodlakela ngeke ngikuvume lokho ngoba uyise ebhubha watshiya konke kimi wathi ngikhangele labantwabakhe kodwa bona sebengiphatha njengomuntu waphandle,” kutsho uMaChirwa.
Ebuzwa ngendaba le, uEnock othe uzwa ubuhlungu ngendlela uMaChirwa aphatha ngayo ilifa likayise.
“Mina ingxabano engilayo loMaChirwa yikuthi uthengisa izifuyo esidla lamatshamali akhe. Ngaqala ngithule ngodaba lolu kodwa ngacina ngibiza abadala ukuthi bakhulumisane laye ngoba lomuzi kababa kasawuhloniphi njalo labafowethu abasafundi bathwele nzima ubaba watshiya izifuyo zokusigcina.
“Ngilimele ngikhonapha ngisubukile ngenxa yobunyamazana bukamama lo, abadala labo baphelelwe ukuthi ngumuntu bani yena lo ongenza into enjalo, abe seqhubeka ngempilo kungabi ndaba zalutho,” kuphetha uEnock.
