uMthunywa
Thando Dube
KULENDODA yakoBulawayo egwetshelwe ukuyapika ejele inyanga ezilitshumi lantathu ngemva kokubophela unkosikazi wayo esihlahleni andubana imbhaxabule ngentambo yegetsi imethesa icala lokungathembeki.
UZivai Honest Matasva oleminyaka engu-33 yokuzalwa ohlala elokitshini leNtumbane umiswe phambi komthethwandaba weWestern Commonage kuviki ephelileyo esetheswa icala lokutshaya umkakhe uKerina Muruko oleminyaka engu-24 yokuzalwa ngentambo yegetsi langebhanti embophele esihlahleni ngemva kokwamukela ucingo abecabangela ukuthi luvela kutshamali.
Umtshutshisi uNkosikazi Memory Ndlovu ubikele inkundla ukuthi mhlaka 3 Nkwenkwezi umetheswacala wabophela umamangala esihlahleni wasemtshaya ngentambo yegetsi kanye langebhanti okwabangela ukuthi alimale emzimbeni.
Amapholisa ancwetshwa indlebe ngabasiki bebunda okwabangela ukuthi umetheswacala abotshwe.
Ebuzwa ngecala leli umetheswacala uvumile ukuthi walenza icala leli njalo waveza ukuthi wayezondile kakhulu ukuthi umamangala kazange amnike impendulo emsuthisayo.
“Umamangala ngumkami, okwangizondisayo ngaze ngacina ngimtshaya yikuthi wehluleka ukungipha impendulo ecacayo ngimbuza ngokuthi ngubani owayemfonele.
“Mina njengomkakhe ngilemvumo yokwazi bonke abantu abamfonelayo kodwa yena wakhetha ukuthi angifihlele lokhu waqala ukuphika,” kutsho umetheswacala.
Engakagwetshwa umetheswacala, umtshutshisi uNkkz Ndlovu ucele ukuthi umetheswacala aphiwe isigwebo esinzima ngoba enze ubudlwangudlwangu ngesikhali emuntwini akade engeke azisize. Uthe ufisa lokhu kube yisibonelo kwabangafisa ukwenza icala elifana laleli.
Ngemva kokulalela icala leli uMantshi uMnumzana Lungile Ncube uqume ukuthi umetheswacala avalelwe ejele okwenyanga ezilitshumi lantathu, ezintathu zakhona zesulwa ngoba umetheswacala eziphathe kuhle ngesikhathi icala leli lithoniswa.
