uMthunywa
SiloGladmore Ncube
UTHANDO luyimpilo njalo luyintokozo enkulu phakathi kwezithandani njalo luyawuqinisa umuzi. Kuhle ukuthi nxa izithandani sezikhethe isinqumo sokuthi zihlale zonke ziqinise uthando lwazo ngokuhlala zikhumbuzana indlela ezithandana ngayo ziphinde njalo zehlise izinga lokulwa ngokukhuza ulaka.
Kukanengi sisizwa ukuthi uzibani ufile ngenxa yothando sebulawe ngowangakwakhe. Abanengi basuka begijimele ukulwa nxa bethola omkabo bejola.
Yebo kubuhlungu sibili kodwa kuhle ukuthi uzibuze ukuthi uyabe etshintshwe yini umuntu ukuze enze isenzo esibi kangaka. Kwesinye isikhathi umuntu wenza ukuganga ngoba vele kuyabe kusegazini lakhe kukanti kwesinye isikhathi wenza lokho ngoba omunye wakhe uyabe engamphathi kuhle kumbe esilela kwezinye izindawo.
Inyanga ezimbili ezedluleyo sizwe ngendoda yeNkayi ehlahlele intombi yayo ngehloka ekhanda yafa ngoba imcabangela ukuthi ujola lamanye amadoda esigabeni. Kambe sibili kuyakusiza ngani ukumgwaza kumbe ukumbulala umuntu kulokuthi nxa usizwa ukuthi uyamthanda uhlale phansi ukhulumisane laye kumbe ubize abadala abayibo abalivumelayo ukuthi lihlalisane.
Asazi kumbe umuntu usuka akhulelwe lulaka esithi uyakhuza. Endulo phela umninimuzi ubelemvumo yokukhuza imuli yakhe nxa iphambanisa loba nje isintu sisithi induku ayiwakhi umuzi kodwa okhokho bebeyisebenzisa nxa bekhuza. Loba kuthiwa yikukhuza bakwethu sungaze utshaye umuntu umbulale. Uthi abakibo bazakuzwa njani?
Khathesi sesiphila kwesinye isikhathi bafowethu lokhu okokutshona utshaya umfazi akusizi ngoba nguwe ocina susentolongweni ngoba amalungelo oluntu awakuvumeli lokhu. Nxa ubona kukwehlula ukukhuza ngomlomo phuma kuye umuntu udinge umuntu ofana lawe ozakwenza konke okuhambelana lawe, kodwa ngiyasola ukuthi ungamthola ongelalo iphutha.
Mthwakazi asizameni ukulungisa okonakeleyo ngendlela eqondileyo hatshi ngodlame, susiya emaphethelweni mhlawumbe umhlaba, imitshado siphela sokusanda imingcwabo ngemimoya emibi le ezungezayo esingena ebantwini.
Kunzima khona akulula ukuzwa umuntu osuqede laye iminyaka nxa sekutshela ukuthi uthando luphelile kumbe sumkhande ezincindela uluju lwemvelo lomunye umuntu. Okusalayo yikuthi wena uzambulala, uzafa wena uzasala nxa ukhethe ukusala uphila, kodwa ngeke usakuthola ukuphumula, akumnandi entolongweni, ungaba lomnyama phinde ulale futhi uzathi ucimeza ubone nangu umuntu uhle uphambane ingqondo. Pho kuyabe sokuyimpilo bani le kulokuthi umekele umuntu umtshiye udinge abanye.
Iyaqhubeka impilo mahlabezulu asizameni ukuphila ngendlela elobuntu njalo sikhuzane njengabantu abakhulileyo.
