uMthunywa
Silo Ncekwenhle Ncube
MTHWAKAZI kaNdaba lina ondlela zimhlophe babetsho beqinisile ontshebe zimhlophe nxa bethi esihle asiphakeli. Kunjalo sibili ngoba nanku sikubona kusenzakala ukusa kwamalanga. Inhliziyo zidabuka njalo nje kungabi ndaba zalutho. Kambe wona umhlaba sawonelani sesaphenduka onyembezi esizweni sochago lenyosi?
Sizaba yini nxa sithathelwa abathandekayo bethu? Qiniso qotho umhlaba uyahlaba batayi!
Kuyinsakavukela umchilo wezidwaba ukuthi nxa ukhulumisa asebempunga emakhanda uzwe bevuma bethi “hatshi sihamba lakho mntakazibanibanyana..” Lakanye baqinisile ngoba nanku ukufa sikuphethe emahlombe noma sibukeka sibutshelezi sicwazimula. Kuba lusizi ngoba kufika njengesela kwemuke lapho esethembele khona kusale kutshaya imbungayezi.
Mahlabezulu ukufa yisilwane esidla sicatshile njalo sifuna eziledanga kuphela. Kusuka kusithunuke amanxeba enhliziyo angapholiyo kusenze sibemdambiyana sixege amadolo sifiphale amehlo lempilo siyesabe. Sizizwe singasilutho ezweni labokhokho bethu. Kambe singakuthini ngoba sekwaba yiyo impilo yethu sizwe sohlangana ngakho kumele sibhekane lakho.
Okwalezinsuku khona kuthena amadolo sizwe sikaMalandela. Akusafani ngitsho lokwekadeni lapho obekuthi nxa kubikwa imfa uzwe kuthiwa ubabamkhulu uNkomo noma uGogo unakaZimbili seye kwelamagade.
Kulezizinsuku uzwe bethi usane oluzelwe emaviki amabili noma intombi kumbe ijaha elileminyaka engaphansi kwamatshumi amathathu seledlule emhlabeni. Lokho akudabukisi kuphela abemuli kodwa lalabo abekade ephila labo abangane kanye lezithandwa zabo ngoba ehambe ngesikhathi sisamdinga okwamagama.
Indidane enkulu ngolutsha lwalamuhla yikuthi lusuka lufele ngaphakathi nxa bethe bahlangana lenhlupho ezingaphezulu kwamandla abo. Kungabe kubangelwa yikuthi obabakazi balamuhla abasatholakali eduze na?
Kodwa kuhle phela bakhona okhulu labobabakazi abatholakala emaphephandabeni kanye lasebulenjini.
Awu! Ngiyalincenga lina bazukulu bakaMzila wegazi dingani usizo kulabo abaseduze lani anduba lidabukise labo abaseleyo. Yebo kambe ngeke sakugwema ukuya kwelemagade kodwa asingakunxusi akusilande khona kodwa nxa ithuba selifikile. Asifundeni ukuthi nxa sesibhekane lobunzima sisondelele labo abaseduze lathi selokhu ekhenceza emabili. Lani bangane lezihlobo asifundeni abantu esiphila labo njalo sibanikeze indlebe zethu ukuze lalapho bebhekane lobunzima benelise ukusethulela.
Kuliqiniso mpela ukuthi esihle kasidleli kodwa umkhuba wokubulala izitsha ezinhle awuphele. Kuyadanisa ukuthi ngensuku zalamuhla bakhona abasakholelwa ekuthakatheni abanye ukuze bengaphumeleli. Kulabo abalokhe bekhunkula ngithi kini sobohla manyosi. Kambe ungabe ungonjani wena ozahlala kukuhambela kuhle? Kuzakuthola lawe ophezulu kadakwa. Asizinukeni amakhwapha sifisele ingane zethu impucuko lempumelelo ukuze isizwe sethu siqhubekele phambili.
Noma kunjalo ngithi ezimulini ezilahlekelwe ligugu duduzekani emoyeni liginye ilitshe libambe imthambo empompoza izinyembezi ngoba uMvelinqagi sevumile kwenzakale. Mayuyu bakaMalandela ngithi mayuyu singakubheki ngeso lenyama ukuze inhliziyo zethu zithole ukuphumula. Ayilale ngenxeba sapho lukaMzilikazi ukuze izihlobo zethu zizuze ukuphumula lapho ezilele khona.
