uMthunywa
Isihloko senkondlo — Ikwindla
IKWINDLA yisigaba somnyaka. Lesi sigaba sithandwa ngabantu abanengi ngoba silokudla okunengi ikakhulu okuvela emasimini kulabo abayabe besebenze nzima. Imbongi iloba ngesikhathi esithandayo kakhulu layo. Lokhu kusobala nxa sihlolisisa indlela abeka ngayo izinto. Imbongi isichazela ngokusemasimini ngalesi sikhathi.
Inhliziyo yembongi ikhululekile njalo ihlalisekile ngekubonayo emasimini ngoba ithi, yaze yanaba inhliziyo.
Isuthisekile ngalokho ekubonayo inhliziyo. Nxa ikhangela amakhabe ibona amakhabe amakhulu ethi aze abazindundu. Amajodo lawo manengi njalo makhulu aze atshayise umniniwo ngovalo. Ye, amtshayisa ngovalo ngobunengi bawo. Nxa kungabanjalo abantu balenkolelo yokuthi ayabahlolela amajodo. Asilazi iqiniso lakho lokhu.
Nxa imbongi ikhangela umumbu lawo iziqu zawo zinkulu, iwufanisa lezigodo. Ngobunzima bawo ucina ulenga kumahlanga awo. Imfe layo iqatha okokuthi oyidlayo ingamqhaqha umlomo ngoba iyabigcwala umlomo ezama ukuyihluba. Phansi lakho lapha akungeneki emasimini ngenxa yezilimo ezinaba phansi, ondumba labondlubu.
Abantwana nxa bethi bayahamba bazwakala phansi bekhutshwa ngamathanga lezigxinga okugcwele indawo yonke.
Nxa ethi jeqe ekhangela emangweni ubona izihlahla zisindwa kungathi zizakwephuka ingatsha ngenxa yezithelo zazo. Abangaziyo bephonguhamba egangeni amaganu ayabawela ebatshaya emakhanda ebavula induma.
Umhlabathi lawo phansi uyadabuka ngenjawutshela labofifi. Lezi yizithelo ezizalela phansi njengembambayila. Nxa sezilamajodo kukhanya ngokudabuka komhlabathi phansi. Phezulu lakho umkhiwa uvuthwe uyenyanyeka okokuthi lempukane usuzehlule.
Abafana abelusayo labo abasakudli ukudla kwemakhaya nanku phela izithelo ziphakele egangeni. Njalo bathembe imiqungo yembuzi zabo. Uchago lunengi okokuthi akula osolayo nxa bezithathela olunye benze imiqungo yabo.
Batshona bequmbile ngemiqokolo ehlinikileyo indawana yonke. Lamankazana sekungani azithwele nje ngoba kudla izigangatsha kunye lemiqwente. Nxa sebesithi izisu zamankazana ziyaqumba kube sengathi ngabantu abazithweleyo kanti hatshi yikusutha nje.
Nxa ikhangela ngekhaya imbongi iswela engakwenza. Amabele inkomokazi aphose aziwisele phansi ngokwehlisa.
Zehlise kakhulu inkomokazi okwenza lembele yazo iphose idabuke. Uchago selulunengi kakhulu okwenza lamagula akhanye esemalutshwana. Asemalutshwana kakhulu amagula okwenzela amasi ngoba uchago selulunengi okwamagama. Izinja lengulube seziwudle kakhulu umlaza okokuthi kaziselandaba lawo yikho kuthi wa seziwukhangela kuphela. Sekunuka endlini ngoba uchago lungahlala kakhulu lucina selunuka ngoba labantwana selubehlula.
Izankefu lazo seziphuma nzima emaguleni zicethula lophethulo lwazo, ngenxa yokuthi abantu kanye lezifuyo zabo bayasutha. Lenkukhu lazo zikhangela lokho okuchithwayo zingabi lendaba lakho. Iyabubabaza imbongi ubuhle bonke lobu njalo iqinisa ukuthi benzelwa umuntu. Isiphetho siveza ukuthi ukhona okwenzayo konke lokhu, akuzenzi.
Konke lokhu kwenziwa ngophezu kwakho konke uNkulunkulu.
