uMthunywa
Thando Dube
INDUNA uNkalakatha ibizo lakhe lokuzalwa linguZwelani Ayanda Ndiweni ogcotshwe ngeviki ephelileyo ukubayinduna yesigaba eNkayi isithembise ukubusa ngobuqotho.
INduna uNkalakatha ugcotshwe ngoLwesithathu lweviki edluleyo ngemva kokutshona kukayise ngomnyaka ka 2014. Induna le ithembise ukusebenza ngobuqotho langokuthembeka esigabeni sayo.
Ikhuluma loMthunywa, induna uNkalakatha iveze ukuthi ubuduna buyinto egoqela ukugcina ukuthula kanye lamasiko ngakho yena uzimisele ukwenza konke okusemandleni akhe ukwenza lokhu.
“Njengoba sengigcotshiwe ukuba yinduna yesigabeni seNkayi, isifiso sami yikuqhubeka ngisenza lokho ubaba labokhokho bami abakutshiya endleleni.
“Angisoze ngibe lobandlululo ngoba sonke siyafana,” kutsho induna uNkalakatha.
UNkalakatha uphinde wagcizelela wathi into afuna ukuyenza esigabeni sakhe yikuthi intsha ithole imfundo ezaguqula impilo zabo.
“Njengenduna ngakhetha ukufunda njalo ngenze izifundo zaphezulu njengoba nje ngiseMidlands State University ngisenza iBachelor of Social Science Honours Degree in Local Governance okuyizifundo ezigoqela ubukhokheli kanye lokuthuthuka. Lezi zifundo ngazikhetha ngoba ngangisazi ukuthi yimi engilandela ebuduneni njalo ngilesifiso sokukhokhela abantu ngendlela eqondileyo ukuze isigaba lesi sithuthuke.
Okunye nje kuyikubana kulabantu abatsha abanengi abatshiya isikolo ngokungananzeleli ukuqakatheka kwaso ngakho umehluko engifuna ukuwuletha esigabeni seNkayi yikuthi bonke abantu abatsha babekwazi ukuqakatheka kokufunda njalo kungabi labantu abazatshiya isikolo besiyadinga imali engasoze ibaphathise nxa sebegugile ngoba ingela pentsheni.
Ebuzwa ngokuthi uzwa njani ngokugcotshwa ukuba yinduna esesemncinyane iNduna uNkalakatha uveze ukuthi wayevele ekwazi ukuthi uzabayinduna kungakho waya esikolo wayafundela lokho.
“Ubuduna yinto etshiyelanwayo ngakho ngangikwazi ukuthi kulandela mina ngemva kukababa yikho ngabona kungcono ngifundele khona.
“Abangane bami lokhe bengiphatha njengomunye wabo kodwa sokutshintshile kancane ngemva kokugcotshwa kwami ukuba yinduna.
“Abanye abasangibizi ngebizo sebengibiza ngesibongo okuyinto entsha kimi kodwa ngizajayela,” kuphetha iNduna uNkalakatha.
