uMthunywa
Ethel Ncube
UKUFA kwenye indoda yeLeighton eNyathi kungundabamlonyeni kulesisiqinti nanko phela umufi kubikwa wafa wavuka kathathu andubana azokufa okokucina ngeSonto kuyonale iviki.
Indoda le uMnumzana Elias Maseko itshiye abantu besigabeni lesi belokhu bezibuza ukuthi bangabe bemngcwabe ephila ngoba besokungokwesithathu esifa, isehlakalo esiyisiga esitshiye abantu bedidene amakhanda. UMnu Maseko ungcwatshwe ngoLwesibili kuyonale iviki kodwa wonke umuntu obekulumngcwabo ubengahlalisekanga khepha besokuyinjayelo ukuthi uyaphela aphinde aphaphame njalo.
UMthunywa uzwe ukuba uMnu Maseko ubehlala emangalisa abantu esiqintini ngokufa aphinde avuke nanko phela ngomnyaka ophelileyo abantu bake bezwa kuthiwa kasekho wabuya waphaphama ngemva kwensuku ezimbili.
Abasiki bebunda bachazele iphephandaba likazulu ukuthi uMnu Maseko ubesephinda isine ukufa. Kubikwa ukuthi abantu bebesithi bangabona ukuthi usefile bagcine isidumbu sakhe okwensukwana kodwa babone isidumbu sakhe sesikhukhumala amathambo lawo aqale ukwenza umsindo besebembona esevuka.
UMthunywa uvakatshele eLeighton ukuze azwisise ngaloludaba lapho akhulumisane lomunye obelande umngcwabo uNkosazana Siphiwe Ncube.
“Mina ngizwe ubuhlungu ngeSonto ngisizwa kuthiwa ukhulu usetshonile ngacabanga ukuthi kumbe uzaphinda avuke njengenhlalayenza kodwa okwakhathesi kukhanya uhambile sibili. Ukhulu ubesacenta indlela ngoba into yokubhubha aphinde aphaphame ibisiyenzakale kathathu kodwa okwakhathesi kwehlule njengoba nje esebekiwe endlini yakhe,” kulandisa uNkszn Ncube.
Omunye wezakhamizi ezihlala esiqintini lesi uMnu Zikhali uveze ukuthi uMnu Maseko ubengumuntu odabuka eMalawi kungakho-ke yena ubona angani abakibo bebengakamamukeli.
“Akungimangalisi ukufa umuntu aphinde avuke, yinto ephilayo njalo ekhona. Lumuntu kukhanya kibo kuseMalawi ingcazelo ekhona ngalokhu kufa kwakhe evuka yikuthi abakibo ngitsho abaphansi bebefika bamphendukise yikho ubelokhu ephela aphaphame ngemva kwamalanga. Ngesiko lakibo bekumele sithi sisuka emangcwabeni sokuke kwavuka isavungazane kwaphakama uthuli okuyikho obekuzakuba yisitshengiselo sokuthi usehambile kibo,” kutsho uMnu Zikhali.
Iphephandaba likazulu lizwe ukuba kungenzeka ukuthi uMnu Maseko angabe wadliswa inhlathu esakhula ukuthi angafi lula ngoba nxa wayidla lokhu obekusenzakala kuMaseko kuyenzakala.
Ekhuluma loMthunywa esinye isakhamuzi uMnumzana Bongani Ndlovu uchaze ukuthi lokho okukhulunywayo liqiniso.
“Yinto eyenzakala kathathu ukuthi umuyi ubesifa simbambe sizwe eseqanda mo okomuntu osefile lenhliziyo yakhe ingasatshayi ngitsho. Ngitsho lasesibhedlela bebefika bathi umuntu kasekho kodwa amane aphaphame nje.
“Ubesithi nxa ephaphama kubelomsindo ongani ngowamathambo akhe akhalayo umbone esesukuma ezihambela achaze ukuthi angabhubha futhi bangambeki kungakedluli iviki.
“Ngesikhathi ebhubha okwesine ngempelaviki ubesesibhedlela, eNyathi. Sizwe umbiko othi usedlule emhlabeni sahle sadela saqala ukulungiselela umngcwabo,” kutsho uMnu Ndlovu.
Iphephandaba likazulu libuye lakhulumisana lomkaMaseko, uNkosazana Ngwenya oveze ukuthi udabukile kakhulu ngokutshiywa ngumkakhe.
“Ukhulu usengitshiyele isizungu, wathwalelwa esibhedlela evele intamo isitshekile kungathembisi ukuthi kuselomuntu ngathi ngcono aye esibhedlela seNyathi kumbe bengaba lecebo lokumsiza.
“Abesibhedlela labo bafika bathi usefile ngempela baqala ukwenza amalungiselelo okumusa emotsha kodwa ngithe ngisalindile nje endlini ngamangala sengifonelwa ngomunye umzukulu wethu kuthiwa usevukile njalo uyazenzela konke esibhedlela ngaphendula umzukulu owayefona ngathi kuzakufa umuntu ongagulanga kambe umuntu obekulesiya simo engabe evukile. Okwakhathesi sesimbekile sokwedlule, okokufa evuka,” kuphetha uNkszn Ngwenya.
