uMthunywa
Ethel Ncube
KUDABA oluhlasimulisa umzimba kulexhegu leNkayi okucatshangelwa ukuba beligcine umgobho ebhodweni ngenhloso yokuthi umunye amadoda inhlanyelo yawo, uMthunywa uyakuveza lokhu lamhlanje.
UMthunywa uzwe ukuthi umgobho lo obubizwa ngokuthi ngumahuba ukhitshwe endlini kaSibayeni Bhebhe oleminyaka yokuzalwa engu-95, ohlala esiqintini esingaphansi kukaSobhuku uGrandman Mpofu eGuwe ngoLwesithathu kuviki ephelileyo.
Kuzwakale ukuba umgobho lo ubungowedibisi ngakho ubusenza ezinye izakhamizi zingavuni lutho emasimini.
Iphephandaba likazulu lizwe ukuba ibhodo le engusayizi 4 ibigejelwe phansi endlini uMnu Bhebhe agcina kiyo impahla yakhe yokulima njalo inyoka le ibigcwele phamu phakathi.
UMthunywa uzwe ukuthi inyoka le ebingamamitha amabili ikhitshwe phakathi kwebhodo le iphila okwenze abantu akade bethe gwaqa emzini lo bathi lothu babaleka beyibona.
Kuzwakale ukuthi umgobho lo ubuphuma ebhodweni le lanxa abantu bebengawuboni “usiyazingela” amadoda esigabeni.
UMthunywa uphuthume wayawela khonale eGuwe waxoxa lezakhamizi wezwa kabanzi ngendaba le.
Esinye isakhamuzi esikhulume loMthunywa uMnumzana Vumani Nyathi, uthe njengabesilisa bakhakhamele ngalokhu abakuzwileyo ngobekusenziwa ngumgobho lo.
“Njengezakhamizi besibize amaZiyoni ukuthi azosilamulela kumalangabi ebesiphakathi kwawo lapha ngoba besingavuni lutho emasimini samangala sisizwa ukuthi uBhebhe ulomgobho awusebenzisa ukuthi atshaye inala njalo umgobho lo uyawuthuma ukuthi uzomunya ubudoda bethu.
“AmaZiyoni la asitshela futhi ukuthi umgobho lo yiwo owenza umntanakhe ongumfana ahlala laye angathathi njalo kalamntwana futhi,” kuchaza uMnu Nyathi.
Esinye isakhamuzi esikhulume loMthunywa uMnumzana Joseph Dube, uthe lokhu wathwetshulwa yingwe kakaze abone akubona ngoLwesithathu kuviki ephelileyo.
“Sasimenyiwe njengezakhamizi amaZiyoni la afika angena endlini kaBhebhe agebha phakathi asedonsa ibhodo le eyayigejelwe phansi.
“Baphuma lebhodo le phandle bathulula inyoka le eyayisesabeka okwakukhanya ukuthi ingakuluma lesibhedlela ungeke ufike uphila.
“Okwasimangalisayo yikuthi ukhulu kazange aphike lutho.
“Ukhulu wasibikela ukuthi umgobho lo ibizo lawo ngumahuba njalo nxa izulu lisina uyakhamisa uliginye yikho nje izulu lingani lapha,” kulandisa uMnu Dube.
Intatheli ibuye yakhulumisana lomunye wezakhamizi yena othande ukwaziwa ngokuthi nguMaNkomo nje kuphela waveza ukuthi kunzima ukuba uMnu Bhebhe aveze iqiniso ngomgobho lo ngoba esesesaba abantwabakhe.
“Into le iyayangisa njalo imehlisa isithunzi emphakathini yena engumuntu omdala.
“Okunye okwakumenza agagase ekuvezeni udaba lwakhe yikuthi uyesaba abantwabakhe,” kutsho uNkszn Nkomo.
UMthunywa uzwe ukuba umgobho lo wabulawa ngomkhonto langamanzi omthandazo wayatshiswa emlilweni kodwa wehlula ukuthi ufe khonapho.
Kuzwakale ukuba umahuba lo waphinda wamangalisa izakhamizi nanko phela wathi etshiswa wavusa ikhanda phambi kwabaphurofethi wakhwaza andubana kuzwakale ilizwi lisithi “kanti lingenzani?”.
Kubikwa umgobho lo wangezelela wathi, “Lingijumile lina lingabafana abancane lingeke lingenze lutho mina ngimdala lapha eGuwe ngeke lingibulale.”
UMthunywa ulevidiyo yomgobho lo utshiswa.
Kubikwa umgobho lo waze wafa ngemva kwesikhathi eside.
Intatheli ixhumane loMnu Bhebhe okucatshangelwa ukuba ngumnikazi kamahuba yena ovumileyo ukuba umgombho lo watholakala emzini wakhe uphakathi kwebhodo.
“Inyoka le yatholakala egumeni lami njalo yayithunywe ukuthi izongibulala. Kangilankani lami ngomgobho abawukhiphayo lapha, abantu abamnyama bayaloya abadlali.
“Angilawo amanengi engingawatsho kumbe kodwa abaphurofethi laba bangihlawulisa imbuzi ezimbili ngemva kokukhipha umgobho lo owawuhlezi ebhodweni yami le,” kutsho uMnu Bhebhe eyikhombela.
