uMthunywa
YiNtatheli kaMthunywa
KULESISEBENZI senkampani kaloliwe iNational Railways of Zimbabwe esilahlekelwe yimpilo yaso kulandela ukugxotshwa yisitimela ngemva kokuzama ukugada isitimela sihamba, uMthunywa uyakuveza lokhu lamhlanje.
Isisebenzi lesi esingunogada wesitimeleni (ibizo siligodliwe ngoba imuli ingakaziswa) sife ngoMvulo kulandela ukugxotshwa yisitimela ebesithwele abantu sisuka eChiredzi sisiya koBulawayo.
Kubikwa isisebenzi lesi sasizama ukunombela isitimela sihamba kodwa ngokuswelakala kwenhlanhla sehluleka ukubamba insimbi sasesigxotshwa yisitimela.
UMthunywa ukhulumisane lesikhulumi sakoLoliwe uMnumzama Nyasha Maravanyika obike ukuthi indaba le yenzakele njalo babuhlungu ngoba izisebenzi zibalulekile kakhulu kunkampani yabo.
“Yindaba ebuhlungu kakhulu leyi, silahlekelwe yisisebenzi ngempela eRutenga. Ugxotshwe yistimela esivela eChiredzi sisiza koBulawayo, isisebenzi lesi bekuyiso ebesikhangela isitimela lesi size sizofika koBulawayo
“Okwenzakeleyo yikuthi isitimela lesi sithe sifika eRutenga kwaba lesinye ebesithwele imfe (sugar cane) zavalelana indlela lalesi. Ngesikhathi zisamile, ebesithwele izimfe siwise izimfe abantu abakade bekusitimela lesi baqala ukuphuma besiya zidobha. Umufi laye ubengomunye ohambe wayadobha imfe.
“Ekudobheni izimfe lezi isitimela lesi ebesithwele abantu sitshaye uphondo ukuthi sesihamba, umufi yikho ukuthi agijime ezama ukweqela isitimela kodwa ngokusweleka kwenhlanhla watshelela wangena ngaphansi kwesitimela samgxoba,” kulandisa uMnu Maravanyika.
UMnu Maravanyika uphinde waxwayisa abantu ukuthi balandele imithetho ebhaliweyo ezilindweni zezitimela.
“Kuqakathekile ukuthi abantu balandele imithetho yonke ebhalwe ezilindelweni zezitimela mayelana lokugadwa kwesitimela. Bengayilandela kakuhle imithetho le ingozi ezifana lalezi azisoze zenzakale,” kuphetha uMnu Maravanyika.
