uMthunywa
Trevor Mhlanga
Insuku ngisafunda kumfundo yangaphansi ngisazikhumbula sengazathi bekuyizolo nje. Ngisacathula ngezilukhuni ama-Toughees, ngigqoka ifanalabanye eyikhakhi, amasokisi atshaya amadolo, lengwane elikhowa.
Kwakungemnandi ukwehlukana lengubo ngesikhathi somqando. Wawusizwa sekubikwa imikhuhlane engekhoyo abadala baze baphundle izihlahla kulwiwe ukuze kube lento ephumayo. Ngiyakhumbula ngolunye usuku umkhathi ugubuzele kulamakhaza asikayo, ngahle ngafikelwa ngumkhuhlane owatshaya umzimba wonke.
Amehlo angcineka ukwedlula awesiphofu, inyawo zafutha okomuntu ovuthelwe ngufezela, ikhanda lavutha lesisu satshilana. Mzwalokho ngaqunga ukucimeza kokuphela, kanti kangibuzanga elangeni; ngathathwa, ngageziswa, ngaze ngaqhutsha nginjalo ngicimezile.
Enkabeni yomango yakhonkotha eyesabekayo, ngakhanya sengandulela sibi semota ukungena amasango esikolo ongiqhubayo esephelewe ngumsebenzi.
Ngiqala ngqo ukudibana lalinyamazana eyesabekayo ebizwa isikolo akuzange kube kuhle kimi. Kwakungathi ngiphoselwe enkantolo yabalamacala asinda ulimi. Umbuzo engahle ngawubuza ngifika ngekhaya kwaba yikuthi zivalwa nini? Impendulo engayithola lapha yaba luxakuxaku oluthelwe ibilebile lamaNdiya.
Usuku lokuvalwa lalo lwafika lezalo, incwadi yombiko walokhu ebengikufunda iripoti yayingumungula wodwa kungafikeki layo ngekhaya.
Zonke lezi nsuku zaphela okwamazolo, khathesi sokuyimbali kaNgwalongwalo laMawaba. Manje kukhona kukhanya umsebenzi omangalisayo owenziwa yinja leya, eyaguqula isigulane somntwana waba yintshantshu kwabalesiqubu. Uhlupho kwakungasi kuthi ngangilele mzwanokho kodwa ngangifunge ijoyi lamakhala abomvu lelanga, ngazimisela ukuba nguCimezile.
Okwabangela ukwehluleka kwami esikolo ngalezo nsuku kwakungasi kungezwa, kumbe itabusi yamatitshala eyayibaba gamu, kumbe ukuthathela khatshana, kumbe ukulala kodwa ukucimeza. Lanxa amehlo onke ayekhangele, lobona intuthu wayengcono. Thatha umkhondo wempilo yakho, kungaki ocimeze kukho ngoba kungahlabusi ukukwenza?
Nxa ungelambono ngekusasa ubona umsebenzi owenzayo ukhathaza, imali engena esambeni ingakukhuthazi ukuba ukhuthalele umsebenzi, isikhathi singabambeki loba ngaphi njalo ulokoloko lokwenza ngamandla lungekho.
Akukho ukucimeza okwedlula lokhu, lanxa sokumele kukulungele uyabe usuvele wejwayele ukwenza usekethekisa, ukungagcini isikhathi lokuhlala ukhonona, khonokho zwi kuyakwenza ulahlekelwe ngamathuba okuqansa ilele lempilo. Uzahlala ungokhalayo kokuphela.
Kimi kwathatha inja ukuba nginanzelele ukuba ukucimeza akuguquli lutho ebantwini engikhethe ukungababoni kumbe indlela into ezenzakala ngazo, kodwa kubuyisela mina emuva. Nga kangiwavulanga amehlo esikolo nga kangifinyelelanga la engikhona namhlanje.
Angazi ukuthi nja bani ezakusiza ukuba ubone ukuba ngelakho inyathelo manqamu elifunakalayo ekuguquleni impilo yakho?
Mehlo amhlophe kulaba abathi ngokujulisa imicabango bananzelele ukuqakatheka kokuhlala besenza izinto ngendlela lanxa kungamnandanga, ukusebenza gadalala lanxa inzuzo ingabonakali ukuze lelothuba lokuntshungubala nxa lifika baleqele bengela kwehluleka kumbe ukuthandabuza.
Ungaze wayilinda, funa uyiswele ezakhokhonta ikuvuse inkophe, uzayibona imihlolo kaCimezile!!!
– Thintana loTrevor Mhlanga kunombolo zika makhal’ ekhukhwini ezithi: +263775523605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
