uMthunywa
Trevor Mhlanga
Kusenkonzweni, okhekhe sebehlaliswe phansi, kukhulunywa ngalumfanyana owayeseyiseka kodwa owenza inkalakatha yento eyababazisa isizwe sonke.
Endulo le, iNkosi uSawuli isabusa koIsrayeli! Kwenzakala ukuba izitha zabo ezinkulu amaFilistiya abahlasele.
Ngaleso sikhathi ayelodumo amaFilistiya ngoba ekhokhelwa yindoda eyayinkulu ingangendlovu eyayibizwa ngokuthi Goliyathi.
Yena wayeyisiqhwaga impela, elamandla okusiphuna intaba ngezakhe izandla, futhi emude esesabeka ethinta emayezini.
Amabutho ayeqhaqhazela phambi kwakhe, kuthi abangaqinanga babeqaleka ngokubona inkemba yakhe nje! Kusenjalo, okungumfana lokhu, okungumalusi wezimvu, lazo ezinganganani kuyaqhamuka kulimpi; ahle ayifunde ivaliwe.
Okusuka kumangalise yikuthi uthi engalimela ibhubesi elinguGoliyathi.
Emva kokutshukana labafowabo ababeyingxenye yebutho, kanye layo iNkosi uSawuli uyavunyelwa ukulwa loGoliyathi.
Kuhle kube yisililo kubafowabo ngoba okungufana sekwehluleke khona ukugqoka impahla zempi, kwazithi laxa phansi, kwayakhangelana lesigelekeqe kungela sivikelo.
Ngubani owayengathi uDavida uzanqoba?
Kumphakathi ophila kuwo, ungamswela okukhuthazayo, ungabatshela ngamaphupho olawo, bathi yizifiso zikaAmkela. Ungaqala ukusungula ibhizimusi thize, kuthiwe izaphelela emoyeni njenge zithukuthuku zenja.
Ungaqina ngamabhuku, kuthiwe azakuhlanyisa; ungazimisela ngomthandazo, kuthiwe uzenza ungcwelengcwele.
Ungasebenza loba yiwuphi umsebenzi, kuqale njalo inkulumo ezingapheliyo kodwa ekupheleni kwenyanga uhlangane lomthwakazi wonke ulinde ukukhongozela zonalezo ndibilitshi ezimbili oziholileyo ukuze bathole ezinye inkulumo ngawe.
Akula ngitsho okukodwa ongakwenza kwamukeleke esigabeni! Futhi uhlala useyiswa, ukhangelelwa emanzini, ngitsho langabazali bakho abakondlayo.
LakuDavida kwakunjalo, kodwa lokhu akumncitshanga ithuba lokumelana loGoliyathi.
Akulanto engaba ngumqogo okukwenqabela ukuba uthole ithuba lokuzingconoza!
Esikhathini esinengi lawo mathuba akhangeleka njengenhlupho ezesabekayo, sengathi yisiqhwaga uGoliyathi, kodwa kumele ubone ngelihlo elibanzi unanzelele isikhala sokuntshungubala ngaso.
Isenzo esisodwa qha, singenza uqanse uze ufike ezingeni eliphakemeyo okwamagama.
Kwaba lilitshe elilodwa zwi elawisa uGoliyathi, ngendlela efanayo umzuzu owodwa ungadala umahluko empilweni yakho yonke; lapha otshaya khona, tshaya kuzwele!
Isikhathi osichitha ulungiselela ikusasa kasilahlekanga, imfundo oyitholayo, kanye lenkambo oba layo kuqakathekise, kusasa kuyizolo.
Usebenzisa onke amathuba owathola namuhla ngamandla langolwazi oluthole izolo.
Nxa ungela lwazi olwaneleyo ngeke wenza okufaneleyo lanxa ulakho konke okufunakalayo ukuba uphumelele.
Intshanshu kumncintiswano wesiqubu zichitha izinyanga lezinyanga zilungiselela imizuzwana engatsho lutho kumjaho omkhulu womhlaba wonke.
Kuyantshintshwa ngitsho lokudla umuntu akwamukelayo ukuze abelamandla kanye lesimo esifaneleyo ukuze ancinte abanye azitholele umklomelo.
Ngesikhathi esalungiselela, kuba sengathi uyahlanya, nxa ezincitsha ukudla thize kube sengathi upika egqoke ezakhe, kodwa esewutholile umvuzo abewusebenzela, baphenduka izimungulu ababemhleka, bemeyisa, njalo bemdlisa imbuya ngoluthi.
Isaga esithi “umendo awuthunyelwa gundwane” siyasebenza lanxa ungekho emendweni, kungenzeka ukuba uhlangane lento obungayikhangelelanga.
Ungafikelwa yikwesaba kodwa kuthathe njengesehlakalo esikuvumela ukuba wenze okungecatshangelwe.
Ungananzelela ukuba utheze olungabaswayo ungalulahli, baza ngalo induku, ukutshaya indiva ulutho okumele umelane lalo usithi mhlawumbe kuzenzeka isimanga kufana lokuzama ukuzikhotha ilihlo.
Hlala uhlomile, uqaphele ukutshikilisana lengxaki zonkana ongahlangana lazo.
Kwathatha umqondo otshiyene lokazulu ukuba uDavida amnqobe uGoliyathi, lapho abafowakhe, inkosi, Labantu bonke ababekhona bebona isiqhwaga esesabekayo, uDavida wabona ngelihlo elibanzi.
Wabona inkalakatha yendoda okulula impela ukuba ayingqikile ngelitshe lanxa engavala amehlo.
Ngenxa yenkambo ayelayo, isibindi lolwazi ayelalo umfanyana oweyisekayo wayesevele esenqobile engakaqali ukulwa.
Lakuwe kuyenzeka, ungathandabuzi, lapho inengi libona usukomlindi uyacina, bona ngendlela emahluko, bona ngelihlo elibanzi!!!
