uMthunywa
Silo Trevor Mhlanga
UKUPHAMBUKA ngento enkulu emangaza uzulu, kancane kancane umuntu uzibona esengene esimeni esinganhlanga lempilweni engancomekiyo. Izikliwi ezidlwengula abesintwana egangeni, ezinengi zakhona zaqala ukonakala zisesesikolo.
Kwakungabafana abangondlekanga, ababesenza ukuxhwala ngokubhoboza imiduli yezindlu zangasese zamankazana, ukuze balunguze lapho amankazana ezembula izidwaba. Amatitsha labalondoloza isikolo kwakuthi nxa bebona lezi zikhala kwesinye isikhathi bazitshaye indiva ngoba kungokuyizi mbobo okuncinyane. Kwakulungile ukuba babhoboze imiduli ngaleso sikhathi ukuze kubonakale ukuba badinga ukuphathiswa ekubeni ngabantwana abaqoqekileyo labantu abalohlonzi kwelizayo. Kodwa njengalokhu zingavalwanga, labo kabananzwanga.
Ngithemba soluke lwafika lakuwe, loludaba solubhode kubomakhalekhukhwini salwabelana ngobunengi bethu. Indaba yalundoda owayesebenza ukupenda. Lundoda wathi eqhatshwe ukupenda isikepe wenza umsebenzi wakhe kakuhle. Esaphakathi komsebenzi, wabona isikhala esikepeni wasivala ngokuphangisa ukuze enze umsebenzi opheleleyo. Suphelile umsebenzi, ngosuku olulandelayo, umqhatshi wakhe wamlanda ekhefuzela lezithukuthuku zisehla ephethe isitina semali. Kulapha-ke lapho undoda lo owayependa azi khona ukuthi ukuvala isikhala lesiya kwasiza abantwana bomqhatshi wakhe ababesale besebenzisa bengazi ukuthi besibhokokile. Ngabe lesosikhala sasingavalwanga babezazibona izibunu zenyoka. Imali ayamukeliswayo undoda opendayo yagabhela abeyiphiwe ngomsebenzi wokupenda, kodwa yayingelinganiswe lempilo zabantwana ayeseziphephisile.
Nxa abafana bebhokoza imiduli leya, baveza ukungabi lalutho emakhanda abo. Ukuvala lezimbobo kuqala yikuzwisisa lolo hlupho lokubaphathisa ngendlela abangaphathiseka ngayo ukuze bangaphindi benze ukuxhwala okunje. Ezinye imbobo lazo zinjalo, andukuba uvale la okubhokoke khona kumele uqale uzwisise ukuba kubhotshozwe yini ukuze wenqabele ukuba kuphinde njalo. Kundaba kandoda opendayo-ke kunanzeleleka ukuthi nga wathikaza ukuvala leso sikhala okosuku olulodwa zwi kwakuyakuba yisililo. Ungekethekisi ukulungisisa okudinga ukulungiswa isikhathi sisavuma, funa leso sikhathi sidlule.
Nanku-ke umuthi wempumelelo, yazi ukuthi lapha okhona kulembobo eziyimikhakha eyehlukeneyo; kungaba sendleleni abantu abaphatha ngayo imithetho, abaziphatha ngayo, kumbe abaphatha ngayo abanye abantu. Kungaba lembobo kubudlelwano beziqhatshwa zakho kumbe osebenza labo. Kuyenzeka njalo ukuba kube lengxabano ebulala amagundwane yomise izihlahla. Okuqakathekileyo akusi kunanza okungokwakho kuphela, uzitshele ukuba awenzi ongakuqhatshelwanga. Ukuphumelela kutsho ukwenza okwedlula okujwayekileyo, ukuthi lapho kulendingeko yokuthi usize umphefumulo womunye umuntu wenze njalo, uvale imbobo!!!
Thintana loTrevor Mhlanga kunombolo zika makhal’ ekhukhwini ezithi: +263775523605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
