uMthunywa
Charity Moyo
KUDABA olusegudwini eMberengwa esigabeni seBvumbura kulesalukazi esitholakale sinqunu esangweni lakomakhelwane.
Isiga lesi senzakale ngoLwesibili kuviki ephelileyo.
Kuzwakale ukuthi uMartha Shiri, 57, utholakale emi esangweni lakomakhelwane wakhe uMnumzana Wellington Nyangani.
Kubikwa ukuba isigaba sabona ibhayisikopho yamahala mhlalokho ngoba isalukazi lesi savuka simi entubeni yesango singagqokanga.
Sithe sibuzwa ukuthi besidingani lapha sehluleka ukuphendula umbuzo.
Umfakazi obikele uMthunywa uPrecious Ncube uveze ukuthi uShiri watholakala enqunu esentubeni yakoNyangani ngoLwesibili.
Ubuye waveza ukuthi abakoNyangani bathi bebona imihlola enje bagijima bazisa uSobhuku uMnumzana Siyafa Ndlovu yena owahle wathi kubizwe abantu bazozibonela imbedumehlwana le.
“Sabizwa njengesigaba, abantu bahamba ngokuphangisa ngoba babesithi kumbe sokulomhlangano.
“Satsha amathe sibona uShiri emi entubeni yomuzi wabantu njalo enguye nje engela ngitsho lezigqoko,” kutsho uNcube.
Kuzwakale ukuthi ngesikhathi abantu befika babuza ukuthi kungani uShiri wayemi entubeni kamakhelwane wakhe njalo engagqokanga.
UMthunywa uzwe ukuthi uMnu Nyangani wachela inina leli ngemithi yakhe wasebonakala esuka lapho ayemi khona njalo wazama ukubaleka kodwa wehluleka.
UMthunywa uxhumane losobhuku wesigaba lesi uMnumzana Ndlovu yena oveze ukuthi indaba enje yenzakala.
Ubuye njalo wathi yena kalankani ngesenzo sikaShiri ngoba babengakukhangelelanga lokhu ngoba kuyinto elihlazo njalo eyangisayo emphakathini.
“Angilankani ngesenzo sikaShiri khona umuntu uyabe esiyagangelani komakhelwane. Lidlozi lobuthakathi akukho okunye,” kutsho uSobhuku uNdlovu.
Intatheli ibuye yaxhumana loMnu Nyangani oveze ukuthi sokuleminyaka eminengi ehawula njalo elokhu ewelwa ngamashwa angalunganga ngenxa yezigangi. Uveze ukuthi wacina esiya kwenye inyanga eyiyo eyamtshela ukuthi uzabona ngawakhe amehlo lokho okuzenzakala.
“Angimangali ngoba inyanga engaya kuyo yakuveza ukuthi ngizazibonela abantu abangiphosayo lakanye isalukazi lesi singesinye salabo ababevame ukugila imikhuba emzini wami,” kutsho uMnu Nyangani.
Uqhubekele phambili esithi kasoze amenze lutho njalo kafuni lutho lukaShiri kodwa okusalayo yikuthi wonke umuntu uyakwazi lokho njalo abantu kabasoze bephinde ukudlalela emzini wakhe.
Iphephandaba likazulu lizamile njalo ukuthi likhulumisane loShiri yena oveze ukuthi kuliqiniso lokhu kodwa laye kakwazi ukuthi kwahamba njani.
“Liqiniso elitshiwoyo kodwa angazi ukuthi kwahamba njani ukuze ngitholakale emzini wabantu, angazi ukuthi lidlozi elinjani elihambisa umuntu engavunulanga,” kuphetha uShiri.
