uMthunywa
Cornelius Luphahla
ZISELE zingelamathe izakhamizi zeSt Luke’s ngemva kokuba enye indoda ithathelwe umfazi nguBen10 yazibophela.
Isiga lesi senzakale ngoMgqibelo ngeviki ephelileyo lapho uVacancy Sibanda (29) emukwe umkakhe, uSiphiwe Ndlovu (32) nguEdias Ncube (17).
UMthunywa uxhumane lomunye wezakhamizi zakule indawo uMnumzana Sipho Ndlovu, yena oveze ukuthi uSibanda uthathelwe umkakhe ilanga selisiya ngomtsha wendoda ngalelolanga.
“Kuthe kusemini yantambama uSibanda wafika emzini wami wathi uhlangane lomkakhe ethandelane loEdias Ncube belubhekise ezitolo zeKenmaur,” kulandisa uMnu Ndlovu.
Uqhubekele phambili wathi uSibanda esemtshele lokho waphuma emzini wakhe wabalandela.
Kuzwakale ukuthi uSibanda wabathola bezihlalele bengagqize qhakala ezitolo zeKenmaur andubana basuke baqonde eMafa lapho okusebenza khona uNcube.
UMthunywa wenelise njalo ukukhuluma loMnumzana Thabani Moyo owabona uSibanda elandela izithandani lezi.
“Ngahlangana loSibanda ekhanya edidekile emoyeni njalo engachelesanga elandela ngemva komkakhe owayehamba lenye indoda.
“Wasengilandisela ukuthi kasasiboni isizatho sokuphila njengoba uNcube esemthathele unkosikazi wakhe,” kuchaza uMnu Moyo.
Kuzwakale ukuthi ngemva kokwehlukana loMoyo, uSibanda wakhulelwa yimicabango ngoba lathi lisiyatshona ilanga umkhosi wokuzihilela kwakhe wawususabalele esiqintini esiduzane lesibhedlela seSt Lukes.
Imizamo yokukhuluma lesikhulumi samapholisa esabelweni seMatabeleland North, uInspector Siphiwe Makonese yehlule ngoba ucingo belukhala lungadojwa.
