uMthunywa
Charity Moyo
Kulendoda yeBinga endaweni esiqintini seLusulu etshiye umthethwandaba wakule indawo ungelankani ngemva kokuveza ukuthi yadlova umntanayo ngoba imhawukele.
Umsolwa oleminyaka yokuzalwa engu-45, ulivumile icala lakhe phambili komthethwandaba ngeviki ephelileyo lapho abesetheswa icala lokudlova umntanakhe oleminyaka yokuzalwa engu-20.
Kuzwakale ukuthi umsolwa njengenja ethi ingaqhoba ithambo iyajayela ubesehlezi ehlukuluza indodakazi yakhe.
Umtshutshisi kulelicala uMnumzana Bruce Maphosa ubikele inkundla ukuthi umsolwa ubesethusela umamangala esithi engavele aveze ukuganga kwakhe ebantwini uzambulala kumbe amxotshe.
Kuzwakale ukuba umsolwa waqalisa ukuhlukuluza umamangala ngomnyaka ka2013 kodwa kwaze kwavela kuwonalo umnyaka lapho unina kamamangala abafica besemacansini wasesiyabikela amapholisa.
Umsolwa kazange athande ukuchitha isikhathi senkundla ngoba uhle walivuma icala lakhe andubana acatshe ngomunwe athi wayehawukela indodakazi yakhe.
Kuzwakale njalo ukuthi kuwonalo umnyaka umsolwa ubesedlove indodakazi yakhe kathathu.
Icala leli lidluliselwe phambili kumhlaka 19 Nkwenkwezi lapho elizaqhubekela phambili lithoniswa.
Umantshi kulelicala bekunguMnumzana Stephen Ndlovu.
