IFC Platinum izabusa: Kamusoko

uMthunywa

YiNtatheli kaMthunywa
UTHABANI Kamusoko umdlali kanobhutshuzwayo oligiqa ekuqembu le FC Platinum uthi uzayiphakamisa iFC Platinum kumqhugelwano weCaf Confederations ukuze ithimu le ifinyelele ku-final yenkezo.
UThabani ubikele uMthunywa ecingweni ukuthi angeke kwenze ukuthi izimbamgodi zeFC Platinum zidliwe lula kumahlandla akuqala omncintiswano lo obuthanisa intshantshu zenkezo kuzwekazi le-Africa.

Umdlali lo uthe ngokuqina abayikho, izimbamgodi zizaloba imbali ngokuba liqembu lakuqala eZimbabwe ukuletha inkezo yeCaf Confederations.

“FC Platinum izayithatha inkezo yeCaf. Ngileqiniso lalokhu ngoba sizimisele. Ngakubika kudala ukuthi angikasuki ku FC Platinum singakaphakamisi inkezo enkulu njengale. Okwamanje angifuni kukhuluma okunengi, kodwa asimeleleni ukunqoba kwethu,” kutsho uThabani.

Kusizini yeCastle PSL yomnyaka odluleyo, umdlali lo utshibilike waba yinsika yethimu le eqede iyintshantshu yenkezo yeChibuku. Inkezo yeChibuku yiyo eyanikeza iqembu leZvishavane leli ithuba lokumela isizwe kumidlalo ye-Caf Confederations Cup.

Uqhubeke wathi: “Ukuba seqenjini leFC Platinum kuyangikhukhumeza ngoba ithimu le isithole okunengi ngiyidlalela. Liqembu elisenhliziyweni yami. Angeke ngiyendawo. Khathesi inhlonso yami ikumidlalo yenkezo yeCaf Confederations. Akula okunye.”

Lomqeqetshi kaKamusoko uNorman Mapeza ukhulume ngokufanayo ukuthi iqembu lakhe selikhangelele phetsheya ukudlala kakuhle lamanye amathimu eAfrica.

“Abadlali bethu bonke abaphakamise iFC Platinum akumelanga sibalahle. Kulalabo asebekhulile ngeminyaka yokuzalwa kodwa babalulekile. Abadlali abasakhula bafunda okunengi kubo. Imidlalo yeCaf le izafuna ukuhlanganisa abadlali abalesikhathi kunguqu lalabo abalethalenta lekusasa egcweleyo.

“Ithuba lokuyancintisa eAfrica liyakhuthaza kakhulu. Umdlali munye ngamunye uyazi ukuthi lesi yiso isikhathi sokuziphakamisa, kutsho uMapeza.

UMapeza uyachinsa ukuyaqeqetsha kunkezo yaphezulu eqoqwa yinhlanganiso yeConfederation of African Football. Loba wake waqeqetsha iqembu lesizwe amaWarriors, ukungena kunkezo yeCaf Confederations kutshiyene leminye imidlalo.