uMthunywa
YiNtatheli kaMthunywa
INKAMPANI yeZimpapers ngenhloso yokuphathisa kumsebenzi omkhulu wokwenqabela imvukuzane izaphatheka kumkhankaso wokuvikela imvukuzane mhlaka 3 Lwezi. Inkampani le yenza lumkhankaso minyaka yonke kodwa lonyaka lumsebenzi umkhulu njalo ungcono nanko phela uzakwenziwa emadolobheni amathathu agoqela iHarare, Bulawayo kanye leMutare.
Isikhulumi seZimpapers uBeatrice Tonhodzayi ubike ukuthi ngalolusuku kuzakuba lohambo njalo koBulawayo, abantu bazaqala ukuhamba besuka eCity Hall Car Park. Kuzasetshenziswa umgwaqo osuka koBulawayo usiya eGwanda kuye jikwa emarobhothini eHoliday Inn besokujikwa njalo kubuyelwe edolobheni eAscot Race Course abantu sebelubhekise eCoghlan Primary School lapho okuzenzelwa khona imidlalo yonke.
“Njengenhlalayenza iZimpapers izimisele ukusebenzisana lomphakathi ukuze kubelobungcono empilweni zabantu kungakho-ke lonyaka njalo sisebenzelana leIsland Hospice siqoqe iZimpapers Cancer Annual Power Walk ezakuba khona mhlaka 3 Lwezi.
Lumsebenzi uzaphathwa emadolobheni amathathu abalisa iHarare, Bulawayo leMutare. “Isiqokoqela kumbe ngithi injongo yaloluhambo yikufundisa umphakathi ngemvukuzane ezijwayelekileyo kundawo ezehlukeneyo zomhlaba, kubuye kufundiswe abantu ukuthi zivikelwa njani,” kuchaza uTonhodzayi.
Imvukuzane ngenye yezifo ezibizwa ngokuthi ngama Non- Communicable Diseases (NCDs) ezithwalise abantu abanengi emhlabeni gadalala. Izifo lezi zijwayele ukubangelwa yikudla okungalunganga, ukunga zivoxavoxi umzimba (exercise) kanye lokunye okungalungelanga umzimba.
Ukuphatheka kubi emoyeni (stress) kanye lokunye okunjenge gcikwane leHIV kwenza ingozi yokubamba umkhuhlane lo ikhuphuke.
“Okunye esizakwenza njengezisebenzi zeZimpapers sinanza lumkhuhlane kugoqela ilanga lapho izisebenzi ezizabuya emsebenzini zigqoke amathenisi, lokhu esikubiza ngokuthi yi Annual Takkie Day. Lokhu sizakwenza kuyonale inyanga sinanza inyanga kaMfumfu okuyinyanga lapho okunanzwa khona imvukuzane yebele.
“Ngosuku lolu izisebenzi zizakuza emsebenzini zigqoke amathenisi (sneakers) lempahla zazo zomsebenzi bebambana lezigulane zemvukuzane njalo kukhunjulwa abasitshiyayo bebulawa yimvukuzane. Imali kanye lakho konke okuzatholwa mhlalokhu kuzasiwa ezibhedlela zabantu ababulawa yimvukuzane,” nguTonhodzayi lo.
Uhambo lolu luvulelwe umphakathi wonke njalo abantu bazabhadala imali engange $5 yokubhalisa baphiwe izikipa abazaziqoka mhla wohambo njalo imali ezatholakala lapho izasiwa ezibhedlela ezigcine abaphila lalumkhuhlane.
Umdlalo uzaqala ngo 6 ekuseni uqhutshwe okwamahola amathathu. Abafuna ukubhalisa koBulawayo bakhululekile ukuthi bathinte uCharity Mugabe kunombolo ezithi 0712389139, ku Email ethi [email protected] kumbe babuye emahofisini eChronicle.
Ngalolusuku kuzakubamnandi ngoba abantu bazathola ithuba lokunyikinya umzimba kusenziwa iZumba ikhokhelwa ngu Sure Machakwa weJive Academy. Amankampani atshiyeneyo abona ngezempilakahle okugoqela iBlood Pressure, iHIV, imvukuzane kanye lomkhuhlane wetshukela azakube ekhona ukuzohlola abantu kanye lokubancedisa ngolwazi ngemikhuhlane le.
