uMthunywa
Msilisi Dube
UMPHATHINTAMBO okhangele ngezemfundo uDokotela Lazarus Dokora usekhuthaze abazali ukuba bekele umkhuba wokwendisa abantwana besebancane ngoba lokhu kubhidliza ikusasa labo.
UDkt Dokora uthe inani labantwana abenda kumbe abathatha beleminyaka engaphansi kwengu-16 liqhubeka lisanda okutshengisa ukuba abazali kabeluleki abantwababo ngokuqakatheka kwemfundo.
“Ungananzelela kulezi insuku abantwana benda bebancane kakhulu ngenxa yamasiko. Kulamanye amalunga esonto abathi kulisiko ukwendisa abantwana abancane.
“Lokhu akulunganga ngoba abantwana labo bacina sebetshiya esikolo.
“Umzali kumele ahlale lomntanakhe phansi amfundise ngokuqakatheka kwemfundo hatshi ukumendisa emncane.
Ungananzelelisa impilweni yalamuhla umuntu ongafundanga nguye osebenza umsebenzi onzima,” kulandisa uDkt Dokora.
Uqhubekele phambili wathi umzali ozatholakala ukuthi wendisa umntwana eleminyaka engaphansi kwengu-16 uzajeziswa.
“NjengoHulumende sikhangele konke okwenzakalayo ngakho asoze sibukele kuphela kodwa lowo ozafunyanwa esenza umkhuba lo umthetho uzathatha indawo yawo. Abantwana bafuna ukuvikelwa yithi, kungakho kumele sibancedise ukuthi bakufinyelele izifiso zabo.
“Okunye njalo abazali kumele babhadalele abantwana imali zesikolo ukwenzela ukuthi bafunde kuhle bengaphanjaniswa. Abantwana abangabhadalanga imali zesikolo bavame ukungenzi kuhle emsebenzini yabo yesikolo ngoba bezikhangelela phansi,” kuphetha uDkt Dokora.
