uMthunywa
C Dube
UNKOSIPHILE utshengisa ukukhalipha kwengqondo engaphezu kweyabantu okuthiwa bayiziyelele. Sibonile eqeda izifundo zakhe engoncinte abanye ephiwa isithupha esikhulu kulesabanye abafundi.
Siyezwa njalo kuthiwa uNkosi yindoda elekhanda elilula, uthathela phezulu izifundo.
Bukhona ubufakazi balokhu ngoba sezibuyile inkukhu lezo ayezimelele ngamehlo abomvu uNkosi utshela uTshili ukuthi uzazama ukuzigcina kuhle njalo ethembele kuye uTshili ukuthi uzamncedisa.
Ulesifiso sokufunda izinto uNkosi ngoba ubuza ukuthi amatsiyane azahlala isikhathi esinganani engakafakwa ezilugwini ngoba yena wayefuna ayongena ezindlini azilungisileyo.
UNkosi ufuna izinto zenzakale ngokuphangisa. Kodwa kuyamethusa ukuzwa uTshili esithi amatsiyane ayezahlala lapho ayefikele khona okwamaviki amathathu abesethuthela ezilugwini.
Lapho inkukhu zizahlala okwamaviki amahlanu kusiya kwayisithupha besezithengiswa.
UNkosi ubuza uTshili ukuthi ngubani ozavuma ukuthenga amatsiyane angako? Uyabuza njalo ukuthi lowo muntu awafide ngani njengoba ezwe ukuthi ukudla kwakhona kuyadula?
UNkosi wayezicabangela ngenkukhu zemakhaya eziphuza ukukhula kanti lapha babekhangelane lezesiKhiwa.
UTshili uyamfundisa ngalezi ezesiKhiwa. “Inkukhu esikhuluma ngazo lapha, jaha, ngezesiKhiwa.
Ukudla lokhu ezikudlayo kukhandwe ngemithi eminenginengi okwenza ukuthi inkukhu zikhule masinyane.
“Azifani lalezi ezethu ezesiNtu eziphiwa inyawuthi ziqhwaye lobulongwe babantwana enkotheni. Lawe uzazibonela njengoba ususebenza phakathi kwazo.
Ngalawo maviki engiwaqambileyo, zizabe sezikhule okwamagama, sezilungele ibhodo.
UNkosi njengomuntu ozinikela emsebenzini awenzayo kuyamkhathaza ukuthi manje zingathengiswa zonke yena uzasala esenzani ngoba yena walanda ukuzofundela ukufuya inkukhu.
UTshili umnika isibindi ngokumtshela ukuthi inkukhu zenyama ngezebhizimusi.
Kumele zimlethele ingcebo lowo ozifuyayo. Ayisizo zombukiso.
Ngaleyondlela-ke umazifuya kumele abone ukuthi zihlala zikhona. Wawuthanda umsebenzi wakhe uNkosi njalo uthi wawubamba ngenkuthalo.
Lanxa wayewuthanda umsebenzi wakhe uNkosi uthi udubo wahlangana lalo sezivala izikolo. Bathi bevala abanye kwathiwa yena lomsekeli wakhe babezasala bekhangela inkukhu zabo.
Babezithanda inkukhu zabo kodwa labo babethanda ukuyabona abekhaya.
Okunye okungahambelananga loNkosi yikuthi nxa sezithengiswa lezo nkukhu bona babengatholi lutho.
UNkosi usilandisela ukuthi labekhaya abakuthandanga ukusala kwakhe esikolo ngekhefu.
Babhalela unina omncane babuza ukuthi wayengaphi? Uthi unina omncane sekunjalo wasukuma wazofika epulazini lapho okwakuhlala khona uNkosi.
Efika unina omncane wathi dibadiba loTshili ezobona ingabe bawuqhuba kuhle na umsebenzi loThambo.
UTshili ubingelela kuhle uNothando, unina omncane kaNkosi embuza lokuthi engamnceda ngani.
UNothando waphendula ngelenzondo ethi uTshili engezake amncede ngalutho ngoba yena wayezodinga umntanakhe abasebemphendule waba yisigqili sabo. UTshili waphendula ethi akulazigqili lapho.
UNothando waphendula ethi zikhona esinye saso sasimi duze laye uTshili njalo yiso ayengaso lapho.
Kuthiwa wathithibala uTshili ekholwa ukuthi wayedibane lalo uhlanya mhlalokho kodwa emangala ukuthi njani lugqoke kuhle lolo hlanya.
Wabuza uNkosiphile ukuthi uyamazi yini lowo mama, uNkosiphile wamazisa ukuthi ngunina omncane.
Waxolisa uTshili wathi uNkosiphile abhode laye bayexoxa.
Ngokuthukuthela uNothando uthi engakakwenzi lokho uTshili ayesithi akwenze wathi: “Ngingakakwenzi lokho othi mangikwenze, ngithanda ukwazi ukuthi kungani ligqilaza abantwabethu kanje?
Libaphatha kanje ngoba lisithi yizilima ezingazi lutho, hayi khona?”
UTshili uphendula uNothando ngokuthi akulamuntu ogqilaza omunye lapho. Wathi abantwana labo babafundisa umsebenzi ukuze babe lakho ukuzisiza empilweni ngelakusasa.
Wayelalelwa ngubani uNothando evele eselowakhe umbono: “Manga! Sikolo bani leso esifundisa langekhefu bengekho abanye abantwana? Kungani ligcina owami abanye libadedela bazihambela emakhaya?”
