uMthunywa
SIQHUBEKA ngezaga zethu lapho esinanzelela khona imvelaphi yazo, ngelithi zivele zona zitshoni njalo zivelela ngaphi.
Sikhangela umhlobo wezaga ezithathelwa ebantwini. Izaga zonke lezi ezingabe zithinta inyamazana kanye lezifuyo lezihlahla zonke zibuya zigudle ebantwini ziyingxenye leyo echaza abantu abayibo abaphila lalezo zinto.Zonke zibuya zichaza impilo yomuntu.
Kesikhangele izaga eziphathelane labantu. Sithathe isaga esithi abake babonana bayaphinda babonane.
Ngokwempilo kunzima ukwehlukana kwezihlobo kumbe izithandani ngoba zingazi ukuthi ziyabuye zibonane nini ziphila na. Abanye sibili babaze bakhale ngokwehlukana lokhu kulapho-ke okusetshenziswa khona lesi saga esiyindlela yokududuza abantu besehlukana okuyindlela njalo yokunika ithemba lokuthi bazahlangana njalo empilweni.
Isaga lesi njalo singasetshenziswa ngendlela yokusongelana phakathi kwabantu omunye esitsho nje ukuthi angabe esenza lokho akwenzayo ngenxa yokuthi mhlawumbe eyedwa njalo-ke bazabonana ngelinye ilanga lapho sesihambelana lesaga esithi sizaze sihlangane ekhalweni lwezimpungutshe, lokhu kusitsho ukuthi lapho abazahlangana khona kwakuzamila utshani.
Lapha-ke kusobala ukuthi kuyaliwa nxa abantu bethembisana nje ngelokulwa.Isaga lesi sinika njalo isiqiniseko sokuthi empilweni loba kungaphi abantu balakho ukubonana futhi empilweni loba kungabafundi abaqhube izifundo bendawonye okweminyaka bayehlukana kodwa kukhona lapho abangahlangana khona njalo.
