uMthunywa
Nomthandazo Ndlovu
UNKOSIKAZI kaMongameli welizwe njalo engumama wokuqala elizweni uKhomuredi Auxillia Mnangagwa usekhuthaze uzulu wakuleli ukuthi abambane ekulwisaneni lomkhuhlane wemvukuzane.
Ekhuluma esesibhedlela seMpilo ngoLwesine lweviki ephelileyo uKmrd Mnangagwa uthe imvukuzane yesibeletho ngumkhuhlane oyingozi kakhulu osuqede inengi labomama.
“Imvukuzane ngumkhuhlane oyingozi lapha elizweni obulala omama nsukuzonke, imbangela yalokhu yikuthi omama abanengi abalalo ulwazi ngomkhuhlane lo.
“Ukuze siphumelele ekulwisaneni lomkhuhlane lo kumele sibambane thina, ngoba lumkhuhlane awukhethi mhlobo, omdala lomncane, obaba labomama, abelungu labansundu wonke umuntu uyamhlasela ngakho ke ngithi kasibambaneni sincedisaneni,” kuchaza uNkkz Mnangagwa.
“Mina sengithethe inyathelo ngahlolwa umkhuhlane wemvukuzane yesibeletho, ngakho ngithi omama labo abasukumele phezulu benze njalo kusese masinya nanko phela lumkhuhlane uyelapheka ungabanjwa masinyane ungakaxhwali,” kutsho uKhmrd Mnangagwa.
UKhomuredi Angeline Masuku onguMinister of State esabelweni sakoBulawayo uncome isenzo sika Khmrd Mnangagwa sokuthatha isikhathi sakhe ehamba ekhuthaza abantu ukuthi bahlolwe kanye lokuthi basebenzelane ukuze lumkhuhlane wenqatshelwe.
“Siyambonga umama uKhmrd Mnangagwa ngokuzinika isikhathi ukuthi kuboniswane ukuthi kuthathwa nyathelo bani ukuze silwisane lomkhuhlane lo oyingozi kangaka. Lokhu kutshengisa ukuthi uqakathekisa impilo yezizalwane zakuleli siyambonga ngalokhu.
“Umama uyisibonelo esihle kakhulu ekulwisaneni lomkhuhlane wemvukuzane ngoba laye uhloliwe ngikhuluma nje, ngakho bomama lani hlolwani likwazi isimo senu,” kuphetha uKhmrd Masuku.
UKhmrd Mnangagwa unikeze isibhedlela seMpilo ibhasi yokuncedisa ekuhlolweni kwalabo abahlala emakhaya kanye lokudla kwezigulane okugoqela impuphu, ifulawa kanye lezinye izibiliboco.
