uMthunywa
. . . Ilembu elaligoqele umufi litholakala lisegcekeni
YiNtatheli kaMthunywa
LOKHE ziphethe izibindi ngezandla imuli ezimbili zeMankwa, eHwange kulandela ukuthola amangcwaba ezihlobo zabo ezisanda kungcwatshwa ephandiwe phezulu kulempahla ezaziphakathi kwamabhokisi zigoqele izidumbu.
Isiga lesi senzakale emzini kamuyi uGilbert Mapeta obhubhe ngenyanga kaZibandlela.
Kuzwakale ukuthi ithuna likaMapeta lavuka liphandiwe ngemva kwensuku ezintathu ebekiwe njalo ilembu elaligoqele isidumbu sakhe liphezulu.
Kufike njalo endlebeni zikaMthunywa ukuthi elinye ithuna elaphandwayo ngelikaKillian Ncube.
UMnumzana Stanford Ncube ongumfowabo kamufi utshele iphephandaba leli ukuthi isiga lesi sitshiye imuli ihlukumezekile.
“Asikwazi ukuthi kuyini okwenzakala emulini ngoba ngomnyaka ophelileyo kulelunga lomdeni elanyamalala egangeni njalo kuze kube lamuhla asikwazi ukuthi latshona ngaphi.
“Sisathithibele salahlekelwa ngumzawami ngenyanga kaMpandula ngomnyaka ka2014. Osokusidida ingqondo yikuthi ekuqaleni kwayonale inyanga ingcwaba lakhe livuke liphandiwe.
“Lokhu kulandela isiga seyinye imuli ekulindawo eyakoMapeta layo eyathola ithuna likamuyi liphandiwe ngemva kwamalanga amathathu engcwatshiwe,†kutsho uMnu Ncube.
Ubuye wathi baphanga bayabikela usobhuku uMnumzana Shadreck Ncube ngesiga lesi kodwa akulanto eyenziwayo.
“Usobhuku akulamzamo awenzayo ukudingisisa ngesiga lesi ngoba laye uyesaba ukuthi hlezi zilale ngaye kusasa.
Kulesakhamuzi esabanjwa ngabomoya ukuthi yiso esigangileyo kulindawo,†kugcizelela uMnu Ncube
Ubuye wathi ngemva kwalokhu imuli yabiza amaZayoni ukuthi azobeka umthandazo ekhaya njalo abuya agqibela ithuna likamuyi.
Usobhuku wakulindawo uMnumzana Shadreck Ncube uthe bakhangelele ukuhlala phansi njengezakhamizi ukuze baphume lamasu okuqeda inkinga ezibahluphayo.
“Okwenzakala esigabeni kuyasethusa njalo kungaphezu kwamandla ethu.
“Kungasenani njengabantu besintwini sikhangelele ukuthi sibelomhlangano njengezakhamizi sixoxisane ngeziga ezenzakala emphakathini.
“Nxa abantu bevuma sizabiza abaphurofethi loba osiyazi ukuthi bazohlanza indawo le ngoba ukuganga kwabantu kukhanya kuqhubeka kumemetheka,†kutsho uMnu Ncube.
