Amapholisa aqala uhlelo lokukhuthuza uzulu

Amapholisa aqala uhlelo lokukhuthuza uzulu

0 53
UChief Inspector Precious Simango

Musa Janga
AMAPHOLISA akoBulawayo asexwayise uzulu ukuba alimuke ukwenza okubi njalo angathwali izikhali eziyingozi njengoba isikhathi sekhefu sesisondele ngoba bengakubotshelwa lokhu.

Isikhulumi samapholisa akoBulawayo uChief Inspector Precious Simango ubikele uMthunywa ukuthi njengamapholisa sebeqalise uhlelo olubizwa ngokuthi yi-Operation Stop and Search lapho abalakho ukumisa uzulu ezitaladeni andubana bamkhuthuze babone ukuthi uthweleni.

“Inyanga kaMpalakazi iba lamacala amanengi obugebengu ngakho thina njengamapholisa sizabe simisa abantu emgwaqweni lezitaladeni sibone ukuba kabathwalanga izikhali eziyingozi.

“Abantu abanengi ikakhulu abesilisa bahamba bethwele izikhali ezifana lengqamu eziyingozi okwenza ukuba balwe bacine begwazana, babulalane okuyinto engalunganga.
“IBulawayo kumele yaziwe njengedolobho elilokuthula ngakho ubugebengu kumele buphele yikho sizabe sikhuthuza abantu ngoba siyazi ukuba ngalesisikhathi bahamba bethwele izikhali.
Uphethe ngokuthi abantu bangethuki nxa bengabona sebemiswa bekhuthuzwa ngamapholisa.
“Siyazi ukuba kungabe kungasoze kubaphathe kuhle abantu ukuthi bamiswe bakhuthuzwe kodwa le yindlela lathi esizama ngayo ukuthi kube lokuthula, abantu bakholise ikhefu labo kuhle,” kuphetha uChief Insp Simango.

NO COMMENTS

Leave a Reply