uMthunywa
silo Phumulani Mpofu
Indoda ehlala ePumula uDumezweni Zulu oleminyaka yokuzalwa engamatshumi amane lasificaminwe mibili (48) ubethandana lomntwana womngane wakhe uSiphesihle Mlotshwa oleminyaka yokuzalwa elitshumi lasificaminwe mibili (18) ahlale laye ngaphandle kwemvumo lolwazi lwabazali bakhe.
Into eyisimanga yikuthi uZulu ubengumngane kaMlotshwa benatha bonke utshwala kodwa uMlotshwa kazange ananzelele ukuthi umtanakhe lomngane wakhe bayathandana baze batshontshana.
Ngemva kwensuku ezithile uMlotshwa edinga umntanakhe ngoba phela engasabonakali ngekhaya, wezwa amahungahunga okuthi ingane yakhe ibonakala emzini kaZulu.
Ekumbuzeni uZulu waphika wemba phansi ukuthi uhlala loSiphesihle. Lokhu kwenza uMlotshwa loZulu bengasazwisisani njalo baxabana kakhulu.
Ekuxoxisaneni labeTrinity Project uMlotshwa uchaze ukuthi uZulu wahlala loSiphesihle waze wazithwala njalo uSiphesihle waseyetshaywa nguZulu emtshayela ukuthi kungani ekhulelwe ngoba kabavumelananga ukuthi angakhulelwa waze wampantshanza isisu ethi akulamntwana lapha njalo elandula ukuthi isisu ngesakhe.
Lokhu kwenza kukaZulu yikho okwabangela ukuthi uSiphesihle akhumbule ekhaya. Ngakibo ebuzwa ukuthi isisu ngesikabani waqala waqamba omunye umuntu ngoba esesaba ukutsho ukuthi ngesikaZulu.
Kuthe lapho unina ethi kabaye kulowomuntu bayekhuluma laye uSiphesihle waluma ulimi wangazwakali ukuthi lowomfana ngubani njalo uhlala ngaphi, kodwa emaphethelweni waze wacina echaza iqiniso lokuthi umthwalo lo ngokaZulu.
Samzondisa kakhulu uMlotshwa isenzo somngane wakhe uZulu waze wafisa ukuthi ngabe uyamtshaya ngoba etshengise ukumedelela lokungamhloniphi ngokuthandana lomntwana olingana lezibulo lakhe.
“Mina angazi ukuthi abanye abantu badalwa babanjani, kambe uZulu sinatha sonke utshwala yena ungicabangela ukungidla izithende,” la ngamazwi kaMlotshwa awatsho ngenhliziyo ebuhlungu.
“Khonapha umntanami bengifuna ukumenzisa izifundo zokupheka ukuze laye enelise ukuphila, uZulu sihlala sinatha utshwala sixoxa ngabantwana langekusasa labo kanti uzibonela umfazi kumntanami.”
Okudida kakhulu uMlotshwa yikuthi uSiphesihle bathi kabuyele ayehlala lapho athatha khona isisu.
Babethi bangathuma abantu kuZulu belandela isiko ukuthi bayekuzwa ukuthi uzafika nini bezokhulumisana ahle abaxotshe bengakatsho udaba abahamba ngalo, besazibika ukuthi bangobani njalo bathunywe ngubani.
Umlobi utholakala kunombolo zocingo ezithi 0773195055 lakukheli ethi [email protected] lakuFacebook page ethiTrinity Project Zimbabwe
