uMthunywa
YiNtatheli kaMthunywa
ZIKHATHAZEKILE izakhamizi zeLukona endaweni yeKennilworth eNyathi nanko phela kulombalisi osevule ibhizimusi evutha amalangabi yokubaza lokuthengisa amabhokisi ezidumbu phakathi esikolo seMangubeni Secondary School.
Isenzo lesi esitshwaqisa umzimba kubikwa sesileminyaka efika emine izakhamizi zikhonona ngaso ngoba zikholwa ukuthi abantwabazo abafunda kulesisikolo bayaphambaniseka ezifundweni ngokuhlala bebona amabhokisi la nxa besezifundweni.
UMthunywa uxhumane lesinye isakhamuzi esiveze ukuba kuyazila ukuthi ibhokisi lesidumbu lihlale lapho okulabantu khona.
Esinye isakhamuzi esithande ukwaziwa ngokuthi nguMaMoyo nje kuphela sithe lokhe kwaqalisa ukubazwa amabhokisi ezidumbu esikolo lesi abantwana bahlala beqaleka.
“Selokhu kwaqala ukubazwa lokugcinwa amabhokisi ezidumbu athengiswayo lapha esikolo, abantwabethu sebehlala beqaleka okungazwisisekiyo.
“Vele khona kuyazila lokhu okwenziwa ngumbalisi lo kodwa ngenxa yokuthi abakhokheli besigaba abazwakali ngale indaba ngoba labo baphakathi kwayo ibhizimusi akukho okungenziwa,” kuchaza uMaMoyo.
UMthunywa uphinde waxhumana lesinye isakhamuzi esiziveze ngokuthi nguLindiwe Ndlovu othe ukuthi kulebhokisi lesidumbu elihlala egcekeni esikolo siyaqala ukukubona.
“Kulemota eyafayo lapho okuhlala khona elinye ibhokisi. Asazi ukuthi lilani lelobhokisi phakathi kodwa-ke siyakuqala njalo ngibona angathi akukodwa lokhu.
“Abantwana bafunde njani behlala bebona amabhokisi ephuma esikolo? Kuyabaphambanisa ekufundeni kwabo. Loba kuthiwa kudingwa imali ibhizimusi yamabhokisi ezidumbu ayivumi ngitsho esikolo,” nguNkszn Ndlovu lowo.
Intatheli yenelise ukukhuluma loKhansila uVilliot Nkomazana wakuleyondawo yena ovumileyo ukuba amabhokisi akhona athengiswayo kodwa walandula ukuthi agcinwa esikolo.
“Yebo, kulamabhokisi athengiswayo kodwa ukuthi agcinwa esikolo akusiloqiniso. Amabhokisi la athengiswa ezitolo,” kuchaza uKhansila Nkomazana.
Esinye njalo isakhamuzi esithande ukwaziwa ngokuthi nguMnumzana Dube ngenhloso yokuvikela umntanaso ofunda kulesisikolo sithe:
“Indaba le bayayazi beyiqonda abakhokheli ukuthi igobile, akula kodwa ovumayo nxa esechithekile. Isikolo lezitolo kubambene, amabhokisi lawa nxa kuthiwa asezitolo ahlala ngaphi ngoba ezitolo kuhlala ukudla lempahla kuphela. Kuyazila lokhu abakwenzayo, labo bayakwazi,” kutsho uMnu Dube.
UMthunywa udingisise kungcitshi kwezamasiko mayelana lokugcinwa kwamabhokisi ezidumbu lapho okuhlala khona abantu, uMnumzana Pathisa Nyathi uveze ukuthi amabhokisi ezidumbu akumelanga athengiswe mahlayana nje.
“Amabhokisi awathengiswa nje mahlayana kodwa kulezindawo ezivunyelweyo njalo ezikhethiweyo ukuba zithengise lezozinto, hatshi ezitolo kumbe esikolo.
“Ngokwesiko ibhokisi liveza ukuhlulukelwa, ukudana njalo lokukhala kungakho-ke akumelanga lihlale lisegcekeni njalo libonwa ngabantwana loba abadala,” kuphetha uMnu Nyathi.
