uMthunywa
Ethel Ncube
IZAKHAMIZI zeLupane kuWadi 19 sezikhalaze kuHulumende ukuthi azincedise ukuthi zakhe ikolitshi yemisebenzi yezandla ngoba abantwabazo bayaswela okokwenza nxa bengaqeda imfundo yabo yaphezulu.
Izakhamizi lezi ziveze ukuba indawo lapho ezifuna kwakhiwe khona ikolitshi zilayo njalo sokukhethiwe lekhomithi ezakhangela ngokwakhiwa kwayo.
Kubikwa minyaka yonke kulabantwana abangaba yisilinganiso se-6 phesenti abaphumelelayo kumfundo yaphezulu kuzikolo ezigoqela iZwangendaba, Mabhikwa, Amandlethu kanye leMthuphane kuthi inengi kaliphumeleli okuyikho okucina kubangela ukuthi bagange ngoba bengelakho okokwenza.
Intatheli ixhumane lesinye isakhamuzi sakule indawo uMnumzana Emmanuel Moyo yena oveze ukuthi abatsha bayahlupheka emakhaya njalo bacina sebesona.
“Abantwabethu bayahawula emakhaya lapha ngoba bengelakho abangakwenza, ikakhulu amantombazana ngoba angaqeda izifundo zabo nxa engaphumelelanga acina esezithwala emithiswa ngabafana abelusa inkomo okuyinto ebuhlungu ebazalini.
“Nxa kungakhiwa ikolitshi efundisa imisebenzi yezandla bangasizakala kakhulu abantwabethu ngoba bezathola indlela yokuziphilisa,” kutsho uMnu Moyo.
Omunye umzali okhulume loMthunywa uMnumzana Njabulo Moyo njalo olilunga lekhomithi uthe ngenxa yesifiso abalaso sokuba lekolitshi efundisa imisebenzi yezandla sebehle bayipha ibizo lokuthi Intsha Vocational Training Centre.
“Sidinga uncedo lwempahla yokwakha ikolitshi yethu ngoba siyazi ukuthi ingaba khona iziqinti zalapha eLupane zizathuthuka.
“Thina njengabatsha sizibona sisiyakhatshana kakhulu nxa singafundela imisebenzi enjengokwakha, ukubaza kanye lokuthunga ngoba sizakwenelisa ukuzisebenza njalo abantu bacine bengasagadi amabhasi besiyadinga impahla koBulawayo kodwa sebethenga khonapha eduze,” kutsho uMnu Moyo.
Intatheli ikhulumisane loSobhuku uFrank Ndlovu yena obike ukuba ikolitshi le ingaphathisa kakhulu abasakhulayo njalo lokuganga kungaba kulutshwana ngoba abantwana sebethole okokwenza.
“Abatsha kungabasiza kakhulu ukuthi bethi beqeda imfundo yabo yaphezulu bahle bangene ekolitshini yemisebenzi yezandla bengatholi ithuba lokona emakhaya.
“Sicela uHulumende lenhlanganiso ezizimele zodwa zisincedise ekwakheni ikolitshi yethu ukuze abantwabethu babe lekusasa enhle lezigaba zethu zithuthuke,” kuphetha uSobhuku uNdlovu.
