uMthunywa
Nkosilathi Sibanda
IZIPHATHAMANDLA zeAfrican Union Sports Council Region 5, inhlanganiso ephethe imidlalo kumhlubulo ongezansi yeAfrica zibika ukuthi sekumele kutshintshwe indlela okukhethwa ngayo abadlali ukuze kudingwe ithalenta loqobo kumincintiswano.
Isaziso lesi siza ngesikhathi imidlalo yabasakhulayo itshengisela ukwehla kobungcitshi kubadlali ikakhulu kumidlalo yokugijima. Inhlanganiso ye-AUSC Region 5 ithe kuminyaka emibili edluleyo amazwe angaphansi kwayo ehluleka ukuthi athole imendulo kumincintiswano ephezulu.
Umaqhuzu we-AUSC Region 5 uStanley Mutoya ubike ukuba ngaphandle kweSouth Africa, akulasizwe esenelisa ukuncintisa okulemvuzo. Iqembu labadlali labagijimi beSouth Africa yilo lodwa elathola imendulo ezilitshumi kumncintiswano omkhulu wamaOlympics oqhutshelwa edolobheni leRio deJanero eBrazil ngoNcwabakazi ka2016.
Amantombazana enguqu eZimbabwe ancintisa kumaOlympics kodwa ehluleka ukunqoba.
“Sesinanzelele ukuthi amazwe ethu awenzi kuhle kumincintiswano yamazwe. Ngenxa yalokhu, kusukela kulumnyaka abadlali bazakhethwa kusetshenziswa isikhathi esifaneleyo. Lapha sikhuluma ngesikhathi esifunwa kumaOlympics.
Abadlali beminye imidlalo ebalisa eyebhola labo bazakhethwa kulandelwa isinqumo zamaOlympics.
“Akusizi ukuba lenani labadlali abanengi abangasoze baphenduke lemendulo kumincintiswano yamazwe. Kumele kutshintshe ngoba iAfrican Union Sports Council Region 5 ilalo ithalenta.”
UMutoya uthe amazwe abo asetshelwe ukuthi aqale khathesi ukulungiselela amaOlympics azayo.
Amazwe angaphansi kwe-AUSC aphatheke kumidlalo yawo yabasakhulayo eAngola ngomnyaka odluleyo.
