uMthunywa
Thando Dube
KULENINA elitshiye izakhamizi zakoBulawayo enzikini yedolobho zitshelwe ngamathe kuviki ephelileyo ngemva kokunqunula lihambe bhunyumunyu esitaladeni sika-6 Avenue libalekela ukubotshelwa ukutshontsha.
NgoLwesebili kuviki ephelileyo emini yantambama inina leli okungasatholakalanga igama, langena esitolo sakoGain Cash and Carry latshontsha i-case yamafutha okugcoba.
UMthunywa uzwe ukuthi esinye isisebenzi sesitolo lesi sathi sizama ukubamba inina leli lanqunula impahla lathi nyawo ngibeletha.
Intatheli yephephandaba likazulu ikhulumisane lesinye isisebenzi esithande ukwaziwa ngokuthi nguNkosikazi Ncube sakoGains Cash and Carry onguye owabona inina leli litshwathika amafutha phakathi kwezigqoko.
“Lalamuhla lokhe ngisamangele ngesiga engisibonileyo. Umama lo ngimnanzelele ephakathi esitolo ngoba ubehamba okusolisayo ehamba okomuntu ozithweleyo. Ngithe ngimtshela ukuthi ame waqhubeka ehamba okungenze ngaqala ukumlandela.
“Uthe ezama ukubaleka wawisa i-case yeVaseline Blue Seal akade eyitshwathike phakathi kwemilenze, wasephakamisa isiketi wasibophela ekhalweni wagijima kuvela izembatho zangasese,” kutsho uNkszn Ncube.
“Ngiqhubeke ngimlandela umama lo, yena egijima phambili wathi efika phambili kwe-Kings Phamarcy kulapho anqunule impahla zonke wagijima ingani sengenwe lidimoni ngamekela wahamba ngoba njengomuntu osontayo kwangehlula ukuthi ngigijimise umuntu onqunu,” kuchaza uNkszn Ncube.
Enye indoda ethengisa ku-6 Avenue ethande ukwaziwa ngokuthi nguSibindi uthe yena wezwa ngomsindo wabantu uvelela empumalanga wagijima esiyabona okwakusenzakala.
“Mina bengizithengisela ngezwa ngesiwowowo, ngithe ngithi mehlo suka ngabobona habe inina libhunyumunyu lichapha izitalada linganakile. Ngiqale ngicabanga ukuthi mhlawumbe linina elingaphilanga engqondweni kodwa abamaziyo baveza ukuthi kaphambananga ngumarobani,” kuchaza uSibindi.
UNkosazana Silver Midza laye owabona isiga lesi uthe inina leli kaliqalisi ukwenza isenzo sokunqunula lingabanjwa litshontsha.
“Inina leli kalikwesabi ngitsho ukunqunula. Ihungahunga lithi laseSouth Africa kukhanya wayetshontsha abaleke enqunu esazi ukuthi abantu bayesaba ubunqunu bomuntu ikakhulu owesifazana omdala. Kuyadanisa kodwa ngoba wehlisa isithunzi sabomama.
“Abantu bebebukele abanye bethatha imfanekiso ezihambela cala celeni ezitaladeni engagqokanga. Uze wancedwa ngabanye omama abamuphe ilembu bamvala,” kutsho uNkszn Midza.
Nkokusweleka kwenhlanhla uMthunywa kenelisanga ukukhulumisana lenina leli.
