uMthunywa
INGUQU ngumdlalo othandwa ngabanengi kuleli yikho nje kwakuthi nxa zingqikilana eMagumeni uthole uzulu wonke elapho. Angithi bathi ungabona inyoni zithe mbo esihlahleni kutsho ukuthi intenjane ivuthiwe njalo imbilaphi isola isilonda.
Ngokunjalo kwakube kuhle ukuthi umdlalo uqalise kuhle uze uyephela kukuhle. Ubuhle lobu bakhiwa ngunompembe njengoba nguye oyabe eyibambe esidukwini. Engamana ayingenise iganga kakho ongasila kuhle kube yivubayitshodo nje.
Khona kuqakathekile ukuthi unompembe asebenze ngobunono lobuqotho hatshi ukuthi asebenzise inkethabetshabi.
Angithi nje esikhathini esinengi nxa kudlala iTshilamoya leDeMbare kwakuphethe kuchitheka igula lamasi kufe leziyoco.
Noma kunjalo bakaMalandela babetsho beqinisile oMandulo nxa babethi koniwa ngomlomo kubuye kulungiswe ngomlomo. Ngalokhu kuqakathekile ukuthi loba nje unompembe eseyonile indaba kwakube kuhle ukuthi abalandeli bakwamukele ngoba phela umsizi ngowembiza zonke.
Angithi nje mhla kungqikilana ezikamagebhula leDeMbare kwaphetha sokuvuka impi ngenxa kanompembe owalukhuthayo ugatsha. Kwaba njalo kodwa phela akujabulisi okwenzakalayo ngoba okwamanje iqembu selinindwe ngodaka.
Ngalokhu-ke kuqakathekile ukuthi unompembe asebenze ngobuqotho ngoba akukho okungalunga nxa engasakwenzanga lokhu. Yebo kambe into embi kayaze yabukwa, ngalokhu ngabe unompembe nxa ethe wayona indaba emdlalweni amiswe okwesikhathi eside ukuze abe yisibonelo kuzulu. Lokhu nxa kungenziwa kungadala ukuthi imidlalo idlalwe kungela buqili kumbe ubudlwangudlwangu.
Mthwakazi kaNdaba kwakube kuhle ukuthi sidlale ngokuthula ukuze sithuthukise ezemidlalo kuleli ngoba bathi kayaze yathi ngokukhaba isiganu ihle ibulawe. Yayithi ingasikhaba ibotshwe ngamandla ukuze ingenelisi ukuhamba kuze kuphele ukusengwa kwayo. Lani isengeni ngobunono balandeli ngoba ungayikhahlameza iyagwanya ngakho kufanele uyitshotshozele.
Angithi nje kuyonale iviki iBosso yenze izimanga zasendulo ngoba bekungekho ubudlwangudlwangu njalo unompembe ubeyibambe ngobuqotho. Ngokunjalo kusobala ukuthi nxa onompembe bephethe ngendlela eqotho akukho okungadala ubudlwangudlwangu emdlalweni.
Noma kunjalo amanzi alokhu egelezela kubonompembe ngakho sokufanele ukuthi babone ukuba bayawuvala umunge wamanzi lo funa ube yinhlalayenzeka konakale yonke imidlalo. Kunjalo bakaMalandela onompembe kubalulekile ukuthi benze umsebenzi wabo ngobunono bengasebenzisi ubandlululo ukuze imidlalo iphele ngobuhle.
