uMthunywa
Cornelius Luphahla
KULANDELA udaba lokuswelakala kwenkosi yamaNdebele koMthwakazi okweminyanga edlula ikhulu uzulu usedidekile nanko phela sokuvele amadoda adlula itshumi ethi azinkosi.
Umbango wobukhosi lo usuleminyaka uqalisile kodwa kathesi sokulenhlanganiso zamasiko ezitshiyeneyo esezethule inkosi ezehlukeneyo ezigoqela uMnumzana Stanley Raphael Khumalo, uMnumzana Bulelani Khumalo kanye loMnumzana uMnumzana Mcijwana Khumalo.
Ekhuluma lozulu emkhosini wesikhumbuzo senkosi uMzilikazi obuseMhlahlandlela ngoMgqibelo kuviki ephelileyo, induna uMnumzana Nhlanhlayamangwe Ndiweni uthe:
“Mahlabezulu njengoba sesiside isikhathi uzulu ekhala ngokuswelakala kwenkosi ngakho inkosi ekhethiweyo nguMnumzana Bulelani Khumalo oyisizukulwane senkosi uLobhengula. Ngalokhu usuku lokugcotshwa kwakhe luzakwethulwa nxa amalungiselelo omsebenzi lo esenzakele.
“Ngokunjalo ngikhuthaza uzulu ukuthi ayihloniphe inkosi ezabekwa njengalokhu okwakusenziwa ngokhokho endulo,” kutsho induna uNdiweni.
Isikhulumeli senhlanganiso yezamasiko uMhlahlo Wesizwe SikaMzilikazi uMnumzana Greater Sibanda ubikele intatheli ukuthi inkosi yamaNdebele ngegcotshwe ngoLwesibili kuyonale iviki.
“Mina ngazisa uzulu ukuthi inkosi yamaNdebele nguStanley Raphael Khumalo ozalwa nguGeza kaMdlomelo, yena ezalwa nguKhuhlumba umntakaHlangabeza Khumalo yena ezalwa yinkosi uMzilikazi. Ngalokhu ngikhuthaza uzulu ukuthi angalandeli abanye abantu osokuthiwa zinkosi ngoba babekwa ngabantu abajonge ukudida uzulu.
“Okunye njalo abantu laba kabaziwa nguzulu ngakho kusobala ukuthi ngeke benelisa ukumhola njengoba bengenelisi ukumhambela,” kutsho uMnu Sibanda.
Isikhulumeli sendlu yenkosi uLobhengula uMnumzana Prince Zwidekalanga Khumalo ebuzwa ngale indaba uthe ngeke bakhulume lutho.
“Thina njengabohlangothi lwendlu yenkosi uLobengula ngeke sikhulume lutho ngokwenkosi ebekiweyo ngoba kayisikho kwethu,” kutsho uMnu Khumalo.
