uMthunywa
Cornelius Luphahla
ZIKHUZA imihlola izakhamizi zesigabeni seLihlo eLupane ngemva kokuvela kwembiko yokuba kulamadoda amahlanu akule indawo abetshintshana umntwana oleminyaka yokuzalwa engu-13 emacansini.
UMthunywa uyakuveza egcekeni ukuba amadoda abalisa uMeluleki Ncube (54), uBrian Moyo, uMlungisi Gumbo labanye babo ababili bangadakwa yithothotho batshintshana umntwana oleminyaka engu-13 emacansini (ibizo siligodlile).
Kubikwa umamangala ubegcinwe lapho okuphekwa khona ithothotho le njalo lo obehlala laye nguye ‘obemthengisela’ amadoda la, amahlanu.
Indaba le esichwayisiswa ngamapholisa kubikwa ibisilenyanga ezimbalwa isenzakala njalo abetheswacala bonke sebedliwe ngumswenya.
UMthunywa uxhumane loMnumzana Edison Mloyi oyisakhamuzi sakule indawo walandisa ngendaba le ethi amadoda la agangile kakhulu ngoba ngabantu abadala.
“Mina ngezwa izakhamizi zisithi umntwana lo uhlukuluzwa nguNcube labanye bakhe nxa sebedakwe yithothotho abayinatha lapha. Lokhu kwenza ngasuka ngayabikela amapholisa ngilezinye izakhamizi ngoba indaba le yayingicaphula kakhulu. Kuthe kunjalo kangikwazi ukuthi ngubani owabatshelayo amapholisa athi efika athola sebebalekile.
“Umntwana lo bathi bembuza ukuthi indaba le iliqiniso yini wavuma wathi sokulezinyanga isenzakala. Okuzwisa ubuhlungu yikuthi umntwana lo umncane kuthi amadoda la madala kakhulu njalo enza lokhu edakiwe okokuthi engacina emthelela umkhuhlane,” kutsho uMnuMloyi.
UNkosazana Elina Siziba omunye wezakhamizi zakule indawo uthe yena usola abantu abahlala lomntwana lo ngoba indaba le bayayazi kodwa babengabikeli amapholisa.
“Mina ngisola abazali bomntwana lo obhinywa yizakhamizi lezi ngoba kusobala ukuthi bayayazi indaba le yikho bengazange babikela amapholisa. Ngeqiniso indaba enje yayingeke yaziwe ngomakhelwane abazali bomntwana bengakwazi.
“Ngokubona kwami lokhu bakwenza ngabomo besenzela ukuthi bathole abantu abanengi bokuthenga ithothotho yabo abayithengisayo. Okunye njalo ngibona angani balolunya ngakho basola ukuthi kasomntanabo lo yikho bemekela ehlukuluzwa ngabantu,” kutsho uNkszn Siziba.
Imizamo yokukhulumisana lesikhulumi samapholisa esabelweni seMatabelelend North yehlule ngoba ucingo lwakhe kalubanjwanga muntu.
