uMthunywa
Cornelius Luphahla
KWENZAKALE insindabaphenduli yendaba esigabeni seDaluka buqamama lesibhedlela seSt Luke’s eLupane lapho eyinye indoda ebhinye khona umfazi wenyanga ebiyelapha qede yamgamula kahlanu ekhanda wafa.
Indida le yenzakale kuviki ephelileyo lapho uMnumzana Robert Ncube obehlala esigabeni seMafa abhinye khona uNkosazana Hlalani Ngwenya (38) umkaMnumzana Jimbani Matokonyola Ncube (54) wamgamula kahlanu ekhanda wafa.
Kubikwa uNcube ngemva kokubulala uNgwenya wamquma umlomo wabuya wamsika izihlathi okucatshangelwa ukuthi wayefuna ukuyathakatha ngezitho lezi.
UMthunywa uxhumane loNkosazana Rachael Ndlovu ohlala kule indawo walandisa ngendaba le wathi umuyi wabonwa ngumzukulu wakhe oleminyaka emihlanu ayelele laye bona babengakholwa ukuthi uqinisile.
“Ekuseni ilanga lisanda ukuphuma umzukulu kamuyi oleminyaka engu-5 njalo ohlala laye wabuya emzini wami wathi ugogo wakhe ubhubhile. Lokhu ngakuthatha kancane ngathi mhlawumbe umntwana uyadlala ngoba usasemncane kakhulu okokuthi ngeke abekwazi ukuthi umuntu ofileyo unjani.
“Okwangimangalisayo yikuthi umntwana lo wayesala ukubuyela ngakibo kwaze kwaba ntambama. Lokhu kwenza ngabiza umakhelwane wami sayakhangela uMaNgwenya samthola eganyulwe kahlanu wabuya wasikwa umlomo lesihlathi,” kulandisa uNkszn Ndlovu.
Ekhuluma lentatheli uMnumzana Brian Mathe oyisakhamuzi kule indawo uthe ngemva kwesehlakalo lesi uNcube wahle wadliwa ngumswenya.
“Kwathi ngemva kokutholakala kwesidumbu lesi sayabikela amapholisa azama ukulandela umkhondo wakhe kodwa sokuze kulamuhla lokhu engabonakali ngitsho lalapho ayesesebenza khona bathi sebelesikhathi bamcina,” kutsho uMnu Mathe.
Ebuzwa ngale indaba uMnu Ncube ongumkamuyi uvumile ukuthi yenzakala wathi yena wayengekho ngalesisikhathi njalo wayengakwazi ukuthi ugcine isigebengu.
“Mina ngasuka lapha ngibizwe eKazhana ukuya kwelapha ngatshiya uNcube lomkami emzini wami njengoba wayecele indawo yokuhlala ngasengimgcina. Kuthe ngilosuku olulodwa ngihambile ngezwa sebengifonela bethi umkami usebhubhile utholakale eganyuliwe wacuywa kodwa uRobert kabonakali.
“Ngalesisikhathi ngangingakawenzi umsebenzi engangiwulande khonale ngahle ngaphenduka ngenyawo ngoba ngangingelamali ngaze ngazofika emzini wami ngelanga lesibili. Ekufikeni kwami yikho engananzelela khona ukuthi umkami ubulewe nguNcube ngoba ngathola impahla zakhe zilegazi,” kuchaza uMnu Ncube.
UNcube uqhubekele phambili wathi isigebengu lesi sabhinya umkakhe kathathu singakambulali njalo usezisola ukuthi wayemgcinelani uRobert njalo usesesaba ukuhlala emzini wakhe.
“Esibhedlela bafika bathi isigebengu lesi siqale sabhinya umkami kathathu singakambulali. Ngiyazisola ukuthi ngangimgcinelani uNcube (Robert) ngoba usengibulalele umfazi futhi sengisesaba lokuhlala emzini wami ngoba kangikwazi okungangehlela. Ngikhuluma nje khathesi ngilala eKenmaur ngenxa yokwesaba isiga esangehlelayo emzini wami,” kutsho uMnu Ncube.
Imizamo yokukhulumisana lesikhulumeli samapholisa esabelweni seMatabeleland North uInspector Siphiwe Makonese yehlule ngoba ucingo lwakhe kalubanjwanga muntu.
