uMthunywa
YiNtatheli kaMthunywa
KULEMULI yeMashayamombe eMhondoro eyenze isenzo esihlasimulisa umzimba nanko phela idonse inyanga ezintathu ilala endlini lezidumbu ezimbili; esikababa kanye lesendodana yakhe, uMthunywa ukuzwile lokhu.
Imuli le ibilandela “isiphurofethi” sokuthi nxa kungasenziwanga lokhu bazavuka kwabafileyo ngemva kwesikhathi.
Isikhulumi samapholisa esabelweni seMashonaland West uInspector Clemence Mabgweazara, ufakaze ngensindabaphenduli le wathi isachwayisiswa.
Indida le yenziwe yimuli yakoPhiri ehlala esiqintini sikasobhuku uMelusi, ngaphansi kwenduna uMurombedzi.
Ngaphandle kokulaywa ukuthi bangafa bangangcwatshwa, imuli le yalaywa ukuthi ingadli isitshwala kuze kudlule insuku ezingu-90 — inyanga ezintathu bengasibumbanga isitshwala njalo bangagezi.
Imuli le ibiphila ngomumbu owomileyo okhanzingiweyo (amaputi) lamanzi nje kuphela.
Konke lokhu bakulandela njalo kabazange bephule ngitsho lowodwa umlayo. Imuli yakoPhiri engamalunga ebandla leJohane Masowe yeNguwo Tsvuku ilebandla layo lemuli, njalo ibikhokhelwa yindodana yabo, engumphurofethi, uJames Phiri (36).
UJames nguye owaqala ukufa kunyanga ezintathu ezilengxenye ezidluleyo ngemva kokugula.
Kubikwa esebhubhile isidumbu sakhe savalelwa endlini, izivalo zabotshwa ngamawaya izikhala zonke zagqitshwa ngamalembu kanye lengubo ukuze kungazwakali umnuko.
Ngemva kwensuku ezimbalwa, uyise kaJames uMusoso Phiri (80) laye wabhubha, isidumbu sakhe safakwa kwenye indlu andubana indaba le iphumele egcekeni.
Phakathi kwesikhathi sonke lesi imuli le ibitshona njalo ilala lezidumbu lezi ezindlini ezikhiyiweyo njalo phakathi bekugcwele impethu.
Izidumbu lezi kubikwa zacina zibola zisezindlini lezi kulandelwa umlayo kaJames wokuthi izidumbu zabo kumele zivalelwe endlini ukuze bangavuki kwabafileyo.
Indabamlonyeni yokuvalelwa kwezidumbu le yaze yavunjululwa ngomakhelwane abasebethwele nzima ngomnuko owawuvelela emzini lo. Amalunga emuli le, kanye lonkosikazi kaMusoso uJudith Maruza (68) kanye labantwabakhe kabazange batshele muntu ngezidumbu ababezigcine endlini.
Indodakazi emulini le, uNkosazana Miriam Phiri (47) uthe kuliqiniso kodwa yena wayengekho kusenziwa imbedumehlwana le.
“UJames wayengumphurofethi wemuli yonke njalo walaya ukuthi abantu kumele bazile ukudla baphile nga-maputi njalo bangagezi okwamalanga angu-90, kusukela ngenyanga kaNhlolanja ababili laba besaphila. Lokhu kwakumele kugcwalise isiphurofethi sikaJames owathi isidumbu sakhe singangcwatshwa njalo loyise uzakufa laye kumele avalelwe,” kutsho uMiriam.
Kubikwa ukuvalelwa kwezidumbu lokhu kwakukhokhelwa nguNkszn Maruza onguye unkosikazi kaMusoso.
Amalunga emuli ayekhona kusenzakala lokhu nguChipo Phiri (38), Patience Phiri (30), Pedzisai Phiri (24), Susan Phiri (27) loSarudzai Phiri (21).
Umalukazana emulini le, uEullita Mapira (34) uthe yena lomkakhe baxotshwa nguJames kodwa basebebizwa isiphurofethi sesithe babuye andubana balaywe ukuthi bazile ukudla kusukela ngenyanga kaNhlolanja.
“Umkami laye ubephatheka ekuzileni ukudla lokhu, kodwa mina bengizidlela. Amanye amalunga emuli acina egula ngenxa yokungadli,” kutsho uMapira.
Kubikwa isiphurofethi sabalaya njalo ukuthi bahlale begqoke impahla zesiPositoli zemibala eluhlaza, ebomvu, emhlophe kanye lelithanga.
Kulamahemuhemu njalo okuthi uJames wayesenza odadewabo amakhosikazi kodwa abemuli le bakulandule lokhu.
Omunye umakhelwane uNkosikazi Jane Nyabawa Bonya (34), uthe waqala ukuzwa umnuko esedlula wasesazisa umkakhe.
“Umkami ngathi sengimtshelile waya emzini lo wafika wadinga ukhulu uZozo Phiri kwathiwa kakho andubana abize abanye bafika bavula izivalo bahlangabezwa zimpethu kusidumbu sikaMusoso.
“Sahamba endlini kaJames laye safica efile, kuzimpethu zodwa, sasesifonela amapholisa,” kutsho uNkkz Bonya.
Kubikwa ngoZibandlela njalo kulelinye ilunga lemuli le, elabhubhayo laqeda insuku ezine lingabekwanga isidumbu sivalelwe endlini uJames esithi uyathandaza ukuze avuke.
Usobhuku uMnumzana Stanley Melusi (69), uthe indaba le wayizwa emhlanganweni.
“Indaba le iyamangalisa sibili, angazi ukuthi yikuthandaza bani lokhu. Ibandla elingenwa yimuli le ngelabo bodwa.
“Izidumbu zathathwa kanye lamalunga emuli le ake ahamba lamapholisa,” utshonjalo uMelusi.
Isikhulumi samapholisa sithe “EZimbabwe kulomthetho othi umuntu angafa kumele angcwatshwe kumbe atshiswe kusiya ngokukhetha kwakhe kumbe amalunga emuli yakhe. Kungakho amapholisa asachwayisisa ukuze bathole icala njalo abanye babo bazakuyamiswa emthethwandaba,” kutsho uInsp Mabgweazara.
