uMthunywa
Thokozile Mbedzi
KULAMADODA amabili esigabeni seMatshogwane Village eMpoengs ePlumtree avuke ubhova ahlahlela enye indoda umzimba wonke eyethesa umlandu wobukhunkuli.
Isiga lesi senzakale ngeviki ephelileyo.
Abetheswacala laba abayizihlobo, uSalani Sibanda kanye loKudye Sibanda kubikwa bahlasela uMdilizelwa Nkomo oleminyaka yokuzalwa engu-57 bethi bayadubeka ngenxa yakhe.
Kubikwa ababili laba bathi beqeda ukwenza icala leli badliwa ngumswenya.
UMthunywa uzwe ukuthi uMnu Nkomo bamtshiya ethe daca phansi wasala ethwalelwa esibhedlela sePlumtree lapho afika wadluliselwa esibhedlela seUnited Bulawayo Hospital koBulawayo.
UMthunywa ukhulumisane lezinye izakhamizi zaveza ukuthi abetheswacala balanda uNkomo bathi bathwele amagabha avuzayo ngoba uyabathakatha.
UNkosazana Khulekani Sibindi ongumakhelwane uveze ukuthi ababili laba bahle babambana babopha amaqhinga okuthi batshaye uMnu Nkomo.
“Lokhe singakwazi ukuthi abafana bakoSibanda babuthatha ngaphi ubufakazi bokuthi uNkomo nguye obaphosayo okwenza baze bamhlasela.
“Silapha isigaba sonke silesithuli ngoba akwaziwa ukuba uNkomo uzasila kumbe hatshi. Sithembele nje kwabaphansi lakuSimakade ngoba isimo abekuso besinzima yikho nje abadala besithi okukhulu akulamkhosi,” kuchasisa uNkszn Sibindi.
“Okubuhlungu yikuthi babenganaki ukuthi bagamula ngaphi babehlahlela nje lapho abezwa kusithi bagamule khona. Okunye okwenza kwabanje yikuthi kwakungelamuntu eduzane, abantu babizwa ngumkhosi owawusuhlatshwa nguMnu Nkomo.
“Abantu bathi befika bona bahle bacela ezinyaweni lalamuhla lokhu akwaziwa ukuthi bangaphi,” kulandisa uNkszn Sibindi.
Kubikwa indaba le yabikelwa amapholisa.
Isikhulumi samapholisa esabelweni seMatabeleland South uAssistant Inspector Nkosilathi Sibanda ebuzwa ngaloludaba uvumile ukuthi badingisisa ngodaba lwamadoda amabili agamule enye indoda ngehloka selufikile ehofisini yabo.
“Udaba lwamadoda agamule enye indoda ngehloka sifikile ehofisini yethu njalo sikhuthaza uzulu ukuba nxa elenhlupho abikele osobhuku loba amapholisa ukuze kungenzakali ingozi ezifana lalezi.
“Sicela njalo nxa ekhona ongaba lolwazi lokuthi ababili laba bangaphi abikele amapholisa aseduzane laye kumbe asitshayele ucingo,” kuphetha uAsst Insp Sibanda.
