uMthunywa
YiNtatheli kaMthunywa
ISAMANGELE imuli yakoMhlophe esigabeni seNdimimbili, eLupane ngemva kokuba ibhuqwe kabuhlungu yimikhoba yaze yadela umuzi wayo yayaphephela kwenye inyanga ekule indawo.
Isisanasana lesi senzakale enyangeni ezimbili ezedluleyo lapho uMnumzana Khawulani Mhlophe lemuli yakhe abadindwa khona yimikhoba ngemva kokungezwani phakathi kuka Mhlophe loninazala uNkosikazi Sitheni Lunga, uMthunywa ukuzwile lokhu.
UMthunywa uvakatshele kule indawo wakhulumisana loMnumzana Jericho Nyathi wathi wayekhona mhla uMhlophe lemuli yakhe betshaywa yimikhoba njalo kucatshangelwa ukuthi bangabe bengabakaninazala.
“UMhlophe lemuli yakhe bebetshaywa ngondofa ngamagade. Kwakubonakala amagade ejikwa kodwa kungakhanyi ukuthi ajikwa ngubani kwaze kwagcwala abantu bezobona ukuthi kuhamba njani. Kwathi kusiyakuba ntambama abantu babaleka ngoba amagade la ayesejikwa kakhulu njalo etshaya abantu.
“Ngelanga elilandelayo uMhlophe lemuli yakhe babaleka batshiya umuzi kodwa isimanga yikuthi sezwa kuthiwa ondofa laba ngabakaninazala umbangisa ukuthi kungani engafuni ukuzokwakhela eduzane lomuzi wakhe ukuze abe emthengela ukudla,” kutsho uMnu Nyathi.
UNkosazana Portia Mpofu ubikele intatheli ukuthi abakoMhlophe babaleka emzini wabo bayaphephela enyangeni koNkiwane lakho ondofa babatshaya baze bayasizwa ngenye inyanga okuyikho abakhele khona.
“Kwathi kusekuseni uMhlophe lemuli yakhe bathwala ezinye impahla zabo babaleka bayangena emzini wenyanga uNkiwane lakho ondofa baqhubeka bebatshaya lenyanga yaze yabaxotsha. Ngemva kwalokho badlulela enyangeni uKukubula Ndlovu okuyikho abasila khona.
“Ngalesosikhathi uMhlophe lemuli yakhe bahle bahlala enyangeni le bakha umuzi wabo eduzane lowayo. Ngikhuluma nje lakhathesi lokhu behlala khona,” kutsho uNkszn Mpofu.
Ebuzwa ngale indaba umkaMnu Mhlophe uNkosazana Princess Lunga uvumile ukuthi lokhu kuliqiniso wathi kodwa ngeke achasise okunengi ngakho ngoba umkakhe akekho.
“Kuliqiniso sibili ukuthi satshiya umuzi ngoba sasitshaywa ngamagade singakwazi ukuthi sitshaywa ngubani. Ngalelolanga sabaleka sayacatsha kwenye inyanga kwaqhubeka kunjalo saze sazosizwa ngubaba uNdlovu, yikho okwenza sazokwakhela khonapha.
“Noma kunjalo ngeke ngibalise okunengi ngoba umkami kakho useBinga, ngabe ukhona ubezakhuluma yena njengenhloko yomuzi,”kutsho uNkszn Lunga.
Imizamo yokukhulumisana loMnu Mlophe yehlule ngoba ucingo lwakhe lungangeni.
