uMthunywa
Thokozile Mbedzi
ZIKHUZA imihlola izakhamizi zelokitshini leMakokoba koBulawayo ngemva kokuba enye indoda iqede amalanga amabili ithe ngxi kutshimula (chimney) izama ukutshontsha eThabiso Youth Centre yaze yezwakala ngephunga isizitshiyile.
Insumansumane le yenzakale ngoLwesithathu kuyonale iviki lapho uAndrea Zunga obeselamalanga amabili ebanjelwe kutshimula ngemva kokuzama ukungena phakathi kwesakhiwo salindawo ezama ukutshontsha, asizwe khona yikuzitshiya okwenza kwezwakala ngephunga.
UMthunywa uvakatshele kule indawo wakhulumisana loMnumzana Ernest Kwenda omunye wezisebenzi zeThabiso Youth Center wathi bathole kugqekeziwe kule indawo ngoLwesibili ngakho bacabangela ukuthi uAndrea nguye ogqekezileyo ngoba bamthole ngemva kokugqekezwa.
“NgoLwesibili ekuseni sithole kugqekeziwe esikolo lesi kwathathwa amakhompuyutha lezigqoko kodwa amasela akhona kasizange sawabona. NgoLwesithathu ekuseni sizwe sokunuka indawo yonke saqala ukudingisisa ukuthi kungabe kuyini okunukayo kanti asibuzanga elangeni.
“Sithe sisadinga sezwa kulomuntu okhulumayo kutshimula esibiza ngamabizo sabaleka sayabiza amapholisa sicabangela ukuthi kungabe kungumkhoba. Ekufikeni kwawo amapholisa afumane ukuthi ngumuntu nje ophakathi kwetshimula kodwa owehluleka ukumkhipha asebiza abe Fire Brigade okuyibo abadilize umduli bamkhipha esezitshiyile,” kutsho uMnu Kwenda.
Ekhuluma lentatheli uNkosazana Tryphine Moyo oyisakhamuzi sakule indawo uthe uAndrea engabe watshiywa ngamasela agqekeza lapha wabuya wathi uphume kutshimula esesabeka.
“UAndrea uphume kutshimula emhlophe okwesabekayo angani yisipoko sonke ebesilapha sabaleka kwasala amapholisa ayiwo ahle ambamba. Ngemva kwalokho saphenduka ngoba besesibonile ukuthi ngumuntu kasosipoko noma nje ubengasenelisi ngitsho lokuhamba ngenxa yendlala.
“Ngokubona kwami engabe wayehamba lamasela agqekeza kule indawo asemtshiya esebona ukuthi usebanjelwe,” kutsho uNkszn Moyo.
UMnumzana Lewis Ndlovu osebenzela kule indawo uthe uzwa ubuhlungu ngokutshontshwa kwamakhompuyutha okufundisa intsha njalo okumdanisayo yikuthi isela leli kade lifunda lapha.
“Mina ngizwa ubuhlungu kakhulu ngokutshontshwa kwamakhompuyutha ayiwo ancedisa ekufundiseni intsha.
Okungidanisayo yikuthi uAndrea nguye esicabangela ukuthi ngomunye wamasela agqekeze lapha ufunda khonapha.
“Noma kunjalo mina ngizaqhubekela phambili ngincedisa intsha ngokuyifundisa ukuze ithuthuke,” kutsho uMnu Ndlovu.
Isikhulumi samapholisa edolobheni lakoBulawayo uInspector Precious Simango ebuzwa ngale indaba uvumile ukuthi yenzakele wathi ukhuthaza uzulu ukuthi avikele amasela endaweni ezehlukeneyo.
“Sesikuzwile ukuthi lapha okutholakale khona uAndrea Zunga ebanjelwe kutshimula kutshonsthwe ama-laptop amabili, lama-desk top computers amabili kanye le-leather jacket. Ngalokhu ngikhuthaza uzulu ukuthi azivikele emaseleni ngoba engangena noma ngaphi,” kuphetha uInsp Simango.
