uMthunywa
Ncekwenhle Ncube
IKOLITSHI yeScience Institute ngoLwesihlanu ngeviki ephelileyo yamukele umvuzo wemali ngemva kokuphatheka kumncintiswano wendlela zokuziphilisa ngezikhathi kubhahe igcikwane leHIV.
Ikolitshi yeScience Institute yamukele umvuzo wemali engange $200 kumncintiswano oqhutshwe eTrust Academy College.
Umncintiswano lo wamakolitshi azimele wodwa lo ubuqoqwe yinhlanganiso yeNational Aids Council (Nac) ngenhloso yokufundisa intsha indlela yokuziphatha ukuze igcikwane leli lingamemetheki.
Bekungokwakuqala ukuthi iNac ixhase amakolitshi azimele wodwa. Sekuleminyaka eminengi yaqala ukusekela izikolo kodwa kuphela lezo ezingaphansi kukahulumende
Amakolitshi aphatheke emncintiswaneni lo alitshumi njalo abalisa iHigher Learning Centre, Denmark, Trust Academy, Science Institute, Precise School of Business, Herentals, Pace, Platform, Foundation kanye leZim College.
Ikolitshi linye ngalinye belilabafundi abathathu abangene emncintiswaneni yemibuzo elitshumi.
IScience Institute yenelise ukuphendula kuhle imibuzo ebibuziwe mayelana lendlela zokuziphatha yazuza imiklomelo engu-24 lengxenye. Kulandele iHerentals College ethole imiklomelo engu-24 lomvuzo we$150.
IHigher Learning Centre yona ibe kunombolo yesithathu lemiklomelo engu-23 yaphiwa umvuzo we$100 kwathi amanye amakolitshi aphume kuhlandla lesine kusiya ku-8 aphiwe ama$50.
UNkosikazi Nozipho Ngulube onguDistrict Inspector wedolobho lakoBulawayo ubonge kakhulu iNac ngokuqhuba umncintiswano lo wokufundisa intsha indlela zokuziphatha ngesikhathi igcikwane lengculazi limemetheka kwabatsha.
“Umncintiswano lo uphathise kakhulu abatsha ngakho sibonga iNac ngenjongo yabo yokuvikela ukumemetheka kwemikhuhlane kwabatsha.
“Ngethemba umncintiswano lo kayisiwo wokupha izipho kuphela kodwa uzafundisa intsha indlela zokuziphatha lokuvikela ukumemetheka kwemikhuhlane,” kuphetha uNkkz Ncube.
