uMthunywa
Francis Dhliwayo
INHLANGANISO yeTrinity Project isebenzelana lommeli wedale lePhalamende weLobengula Constituency uKhomuredi Maideyi Mpala iqhube umkhankaso wokufundisa izakhamizi ngokuqakatheka kwencwadi zokuzalwa kanye lezokufa.
ITrinity Project iqale ukuqhuba lumkhankaso kuviki ephelileyo eNjube Hall andubana baqhubekele phambili befundisa uzulu eNew Lobengula Hall.
UKhmrd Mpala uveze ukuthi umkhankaso wokukhuthaza izakhamizi ukuthi zithathele abantwana incwadi zokuzalwa kanye lezokufa uwuqalise ngoNkwenkwezi nyakenye.
“Siqalise umkhankaso wokukhuthaza izakhamizi ukuthi zithathe incwadi zabantwana zokuzalwa ngokuphangisa nyakenye ngoNkwenkwezi njalo besiqhuba umkhosi lo maviki onke.
UMqondisi weTrinity Project uMnumzana Pumulani Mpofu uchaze ukuthi njengenhlanganiso abaniki uzulu incwadi lezi kodwa bahlose ukuthi banike uzulu ulwazi ngendawo okumele baqonde kuzo nxa behlangana lohlupho ekuthatheni incwadi zokuzalwa kanye lezokufa.
UMnu Mpofu uchaze ukuthi inengi labantu abadinga usizo lwabo ngasebekhulile abagcina abazukulu kumbe labo abahlala labantwana abafelwa ngabazali.
“Izalukazi lamaxhegu abagcine abantwana abazalelwa phandle kwelizwe sibakhuthaza ukuthi badinge imali engange-$50 yencwadi ebizwa ngokuthi yi-citizenship.
“Incwadi le yiyo enika imvumo yokuthi umntwana abe ngowakuleli ilizwe. I-$20 yokubhadala emapholiseni nxa kuyikuthi umntwana wangena elizweni engela-phasipoti, kodwa nxa engene elizweni ngokusemthethweni esebenzise iphasipoti ubhadala i$50 kuphela eyokumnika imvumo ukuthi abe ngowakuleli ilizwe,” kuchaza uMnu Mpofu.
Uthe ngohlelo lolu bahlose ukufinyelela lalabo ababelethela ezibhedlela lasemakilinika kodwa abantwababo bengelazo ncwadi zokuzalwa ngenxa yokuthi bayabe belezikwelede lapho ababelethela khona.
“Abaphakathi kwenhlupho ezifana lalezi sibapha incwadi esizibiza ngokuthi ngama-referral letter okucela kubakhulu bezibhedlela ukuthi bathole ama-birth record.”
UKhmrd Mpala uveze ukuthi izakhamizi azilalo ulwazi olwaneleyo ngendaba zokulungisa amaphepha okuyikho okuzenza zesabele khatshana kukanti khona kuqakathekile ukuthi zibe lencwadi lezi.
“Sifundisa izakhamizi ukuthi nxa zifuna incwadi yokufa ziyithola ngaphi, kumbe nxa ungayilahla incwadi yokuzalwa kumbe njalo ufuna ukuyitshintsha uqonda ngaphi ngoba incwadi lezi zililungelo lomuntu wonke.
Uphethe ngokuthi uyajabula ngendlela abantu abamukele ngayo uhlelo lolu kungakho uzahlala phansi akhulumisane labanye abammeli bedale lePhalamende ukuthi balusabalalise kwamanye amalokitshi.
“Abantu balwamukele kuhle kakhulu uhlelo lolu okutshengisa ukuthi bayaludinga kungakho ngizakhulumisana labanye abakhokheli ukuze silumemethekise kuBulawayo wonke,” kuphetha uKhmrd Mpala.
