uMthunywa
Cornelius Luphahla
LIDLA amahabula inina lesigabeni seVozheni eTsholotsho ngemva kokubhujelwa yindodakazi yalo (12) efe isithi itshaywa ngabafana abahamba logogo wakhe okubangele ukuthi likholwe ukuba ubulewe nguninazala.
Isiga lesi senzakale emavikini amabili adluleyo lapho uNkosikazi Lubelihle Ndebele abhujelwe ngumntanakhe uBianca Ndebele (12) ethi utshaywa ngabafana abahamba logogo wakhe uNkosazana Thandeka Ndlovu, uMthunywa ukuzwile lokhu.
UMthunywa ukhulumisane loNkosazana Edica Ncube oyisakhamuzi sakule indawo wathi uNkkz Ndebele uhlala exabana loninazala ethi uyaloya njalo kuthe sokubhubhe umntanakhe wahle wathi nguninazala.
“UMaNdebele uhlala exabana loninazala ethi uyamloya yikho efelwa yizifuyo zakhe. Khathesi kuthe ngemva kokubhubha komntanakhe wahle wathi nguye ngoba umntwana lo ufe ethi utshaywa ngabafana abancane abahamba logogo wakhe.
“Lokhu kube yisimanga esigabeni ngoba lami nginje ngamuzwa umntwana ethi utshaywa ngabafana bakagogo wakhe. Yikho okudala ukuthi abantu abanengi bakholwe ukuthi uMaNdlovu ulabondofa ababulele umzukulu wakhe,” kulandisa uNkszn Ncube.
Ekhuluma lentatheli uNkkz Ndebele uthe uzwa ubuhlungu ngokufa komntanakhe njalo uyakholwa ukuthi wabulawa nguninazala.
“Ngizwa ubuhlungu ngokufa komntanami ngoba ufe buhlungu. Okwenza ngithi umamazala ungidlele umntanami yikuthi ufe ekhala ngokuthi utshaywa ngabafana abancane abahamba logogo wakhe okuhle kwaveza sobala ukuthi ngondofa bakhe.
“Ngokunjalo umamazala uzazibonela sibili ngoba lami kangihlalanga phezulu kwezandla ngesiga esingehleleyo,” kuchaza uNkkz Ndebele.
UMnumzana Clifford Ndebele onguyise omncane womntwana lo obhubhileyo uthe ngamanga ukuthi umntwana lo ubulewe ngunina wala lokuthi intatheli ikhulume lonina.
“Ngamanga aluhlaza ukuthi umama nguye obulele umntakamnewethu yikuthi nje umkamnewethu uyamzonda umama. Ngabe uyaloya wayezasiqeda sonke. Umka-mnewethu uyadelela sibili ufuna ukubotshiswa abhadale ngoba uyasithuka nxa ethi umama uyaloya.
“Indaba le ngihle ngayayibika lakusobhuku ukuthi ithoniswe sibili simhlawulise ukuze angakuphindi lokhu akukhulumileyo.
“Ngeke ukhulume lomama ngoba usekhulile akulalutho azakutshela lona ungaphindi futhi ukungifonela,” kuphetha uMnu Ndebele.
