uMthunywa
KUNZIMA ukuthola umsizi wendlini oqotho njalo othembekileyo ozakusiza endlini ngokugcina ikhaya lihlanzekile, ukunakekela abantwana loba ukuhlanza impahla zabantwana zokugqoka.
Banengi abantu abahlala bekhala ngabasizi babo bezindlini bethi bamane batshintshe ngemva kwamaviki amalutshwane nje uzwe sebesithi abantu laba angani bazalwa ngumama oyedwa njengabowindi bemtshova.
Bakhala mihla lamalanga abantu ngabasizi babo abenza izinto ezingahambisani lezivumelwano zabo.
Uzwa omunye ethi ngiphangise ukuphenduka endlini ngivela emsebenzini ngathola usisi egqoke impahla zami ezithatha izithombe. Omunye uzwa esithi; ukudla akusayiqedi inyanga endlini angazi ukuthi kuya ngaphi kuthi omunye laye athi impahla zami ziyanyamalala endlini angazi ukuthi ziya ngaphi. Kunengi okwenziwa ngamankazana kanye labomama abasisizayo emakhaya kukanti kwezinye izikhathi nxa kuyikuthi yena umdala kulawe uyabe esekutshela ukuthi umuzi wakho uwugcine njani afune langokukukhuza kwezinye izikhathi uzibuze lawe ukuthi kwenzakalani. Omunye uvele avuke ngolaka nxa uke waqala inkulumo uzama ukumqondisa.
Uzwa amanina ethi angahlangana ekhonona ngabasizi babo bezindlini bekhuluma lokhu lalokhuya ngabo. Kodwa-ke kuliqiniso yini ukuthi odade laba esihlala labo ezindlini abasincedisayo vele kabenzi kuhle bonke? Lokhu akusilo qiniso. Bakhona abantu abazimiseleyo emisebenzini yabo kungabe ngowendlini kumbe ngaphi.
Bakhona abanye njalo abantu asebehlale iminyaka leminyaka lomsizi oyedwa okutshengisela ukuthi lumsizi uyabe ewazi umsebenzi wakhe njalo ethembekile.
Kungakho-ke kungumbono woMthunywa ukuthi umuntu wonke ahlonitshwe angabe ekusebenzela endlini yakho, esidla ukudla kwakho kodwa laye ngumuntu olamalungelo okutsho ukuthi kumele ahlonitshwe njalo aphathwe kuhle.
Lokhu kuqakathekile ngoba umuntu ungamhlonipha kukalutshwane ukuthi laye ehluleke ukukuhlonipha lokukusebenzela kuhle ngaphandle nxa evele eyisiwula. Akulunganga ukuhlala uthethisa umuntu okuphathisa endlini uphinde umenzise imisebenzi engasiyakhe njengokuwatsha impahla yakho leyomkakho njengomama.
Phela abanye bacina sebewatshisa osisi laba impahla yangaphansi uthole umntanabantu edubeka ngengcekeza yabantu abadala. Lokhu kulihlazo lokucina. Umuntu lo umthethe ukuze akuphathise ngemisebenzi ethile hatshi ukuthi aphathe ingcekeza yakho leyomkakho.
Okunye okwenza abantu laba bakhanye angani balolunya yimali eyingcosana esibanika yona. Uthola umuntu eholisa omunye umuntu ophefumulayo njengaye njalo olabantwana i$40. Uyabe usithi ayenzeni elizweni leli elimi manzonzo kwezomkhonomi kangaka? Ungamsola nxa esekwenzela ulaka kumbe ekutshontshela na umuntu lo?
Asifundeni ukuphatha abanye abantu ngendlela esifuna ukuphathwa ngayo lathi.
