uMthunywa
Cornelius Luphahla
UGCWALISEKILE umbhalo webhayibhilini eligcwele othi “ayisibo bonke abathi Nkosi, Nkosi abazawubona umbuso wezulu,” nanko phela kulomgcinisikhwama welinye ibandla leZiyoni eLupane otshayele imali yebandla esikhewini kanye lezifuyo zebandla andubana atshaye utshani.
Inina leli uNkosazana Samukelo Nkomo webandla leJerusalema Church in Zion lesiqintini seManganganga uhuquluze imali yebandla engange-$250 kanye lembuzi ezinhlanu.
UMthunywa uxhumane loMnumzana Bigboy Ndlovu ongumdikoni walelibandla waveza ukuthi uNkszn Nkomo ubeselezinyanga ezimbalwa esala lemali yebandla baze bananzelela sokufanele baye koBulawayo ukuthi sedle imali.
“UMaNkomo njengomgcinisikhwama webandla besimthembile kodwa okusimangalisileyo yikuthi besesilenyanga ezintathu simtshela ukuthi alethe imali yebandla njengoba besilungiselela ukuya emhlanganweni koBulawayo. Sathi sesibona ukuthi sokusele iviki ukuthi siye emhlanganweni samlanda emzini wakhe okuyikho asithela ukuthi imali yebandla uyisebenzisile.
“Into eyangidanisayo yikuthi lembuzi ezinhlanu esasimgcinise zona sathola zingasekho ethi zadliwa ngamakhanka.
Asazi ukuthi amakhanka akhona avela ngaphi ngoba kithi amakhanka kawakho akwezinye izigaba ezikhatshana,” kutsho uMnu Ndlovu.
UNkosazana Lethubuhle Galela onguMkhokheli kulelibandla ubikele intatheli ukuthi uNkszn Nkomo ubaleke ngemva kokubona ukuthi ilanga lakhe lokuthonisiswa ebandleni selifikile.
“UMaNkomo wathi ngemva kokudla imali yebandla lembuzi sambuza wavuma ukuthi uyidlile noma nje wala ukuthi imbuzi uzidlile. Lathi njengabazalwane sabona kungcono ukuthi singambophisi sasesibeka ukuthi sizamthonisisa ngeSonto siphuma enkonzweni. Kuthe kunjalo sezwa ukuthi ubalekile akwaziwa ukuthi uyengaphi.
“Lokhu kungizwisa ubuhlungu kakhulu ngoba ugcolise ibandla abantu bazabona angathi ibandla lethu lilamasela khona kunguye yedwa isigangi,” kuchaza uNkszn Galela.
UMfundisi walelibandla uMnumzana Robert Kuyafiwa Moyo ebuzwa ngale indaba uvumile ukuthi iliqiniso wathi yisilingo esehlele ibandla ngakho bazalikhulekela ukuze lingadiliki.
“Kuliqiniso ukuthi umgcinisikhwama webandla udle imali kanye lembuzi kodwa akusiyonto enzima, yisilingo nje esizama ukuzamazamisa ibandla lethu njengoba livutha ngokomoya. Sizakhuleka kulunge ukuze ibandla lingadiliki,” kutsho uMfundisi uMoyo.
Imizamo yokukhulumisana loNkszn Nkomo yehlule ngoba ucingo lwakhe lwalile ukungena.
