uMthunywa
YiNtatheli kaMthunywa
IQEMBU leTsholotsho FC lichinse ukuhlohla amabhola amathathu lokhe langena kuligi yeCastle Lager PSL, umqeqetshi wayo wahle wazikhukhumeza ngokubika ukuthi alisoke lixotshwe kulisizini njalo.
Ngokubhoboza amambule kathathu mhla lidlala leHwange ngeviki edluleyo, uLizwe Sweswe uthe abadlali bakhe bathole ukuzethemba ukuthi iqembu labo lizasinda ukuthi lixotshwe kuligi ephezulu njengalokho abakwenza ngo2015.
USweswe ukhulume kanje ekhuza uvalo ngoba usephiwe elinye ithuba lokuthi agcine umsebenzi wakhe. Bekusaziwa ukuthi inkokheli zeTsholotsho beseziseduzane lokubopha inyathelo lokuthi kudingwe omunye umqeqesthi okhaliphileyo.
UMthunywa uhlale phansi loSweswe kuliviki lapho umqeqetshi lo ayethule ukuba iTsholotsho asithimu yokwethukela ngoba izavuka kuhlandla lesibili leligi.
Iziqholo zeZhwane ziqede imidlalo elitshumi lane zikunombolo yetshumi lantathu kungalane.
USweswe uthe abalandeli abafunde ukulinda ngenxa yokuthi uzakhuza iqanse kulogu iTsholotsho.
“Ithemba lisesekhona. Abalandeli bethu bengalahli ithemba ngoba abadlali sebevuke khwatshu. Mina njengomqeqetshi ngizenza loba yini esemandleni ami ukuthi singaphindeli kuDivision One.
“Iziqholo zeZhwane sisasekhona kuPSL. Abafana bami basebenza gadalala ukuthi sinqobe kumidlalo esisele layo.
Ngeke siphinde sibuyele ukuyadlala ezikwakweni,” kuchaza uSweswe.
Ubuye waveza ukuthi abalankani labakwenza kumdlalo wabo bebhuqa iHwange, wathi iveve labafana seliqansile.
“Umdlalo wethu esibelawo leHwange ngeviki ephelileyo usitshengise ukuthi amandla sisaselawo okuthi sibhuqe lamanye amaqembu.”
UFarai Sibanda umqeqetshi wabonozinti laye ucele ukubika umbono wakhe kuphephandaba likazulu. Uthe iqembu alisabuyeli emuva njalo basasele lemidlalo eminengi kuhlandla lesibili lesizini.
“Iqembu lisasekhona kuPSL. Abalandeli bethu bengesabi lutho. Konke sekulungisisiwe ngakho sizanqoba lathi siqanse njengoba likunanzelela ukuthi amaqembu aphezulu kulogu siseduze lawo njani ngemiklomelo.”
Kusenjalo, ngoLwesithathu iTsholotsho izagqikilana leMutare City Rovers kumdlalo wayo wokucina wehlandla lakuqala lesizini.
Kweminye imidlalo, iHighlanders izadlala leTriangle FC enkundleni yeBarbourfields ngelanga elifanayo.
Imidlalo ekhona:
NgoMgqibelo: Chicken Inn v FC Platinum (Luveve).
NgoLwesithathu 27 Ntulikazi: Highlanders v Triangle (Barbourfields), Tsholotsho FC v Mutare City (Luveve).
