uMthunywa
Cornelius Luphahla
KUDABA olutshwaqisa umzimba, kulomfundisi wesigabeni seZimnyama ePlumtree webandla le-Everlasting Church in Zion okucatshangelwa ukuba uselezidumbu ezine phansi kulandela ukubakhulekela ukuthi bafe esebenzisa amanalithi kanye lamalembu amnyama, uMthunywa uyakuveza lokhu lamhlanje.
Kuzwakale ukuthi umfundisi lo, uMnumzana Tshedza Moyo uqale esebenzelana ndawonye lomakhwapheni wakhe uNkosazana Mpilo Nyathi oyisakhamuzi kule indawo njalo okubikwa ukuthi nguye obemupha amabizo abantu ethi kawakhulekele awaqalekise ngoba bembangisa isikhundla sokuba ngumcebisi (advisor) esigabeni.
Ubugangi bukaMfundisi uMoyo loNkszn Nyathi buvele ngemva kokuxabana kwabo kuviki ephelileyo.
Kucatshangelwa ukuthi umfundisi lo ubeganga lomakhwapheni wakhe lo andubana baxabane esemthola elele lenye indoda.
UMthunywa ongelampontshi uvakatshele kule indawo wakhulumisana loMnumzana Simon Ngwenya waveza ukuthi umfundisi lo ugangile ngoba sowabulala abantu abanengi esigabeni.
“Umfundisi lo ugangile sibili ngoba wathi esexabana loMaNyathi waveza ukuthi uMaNyathi nguye owayeletha amabizo ezakhamizi ethi kaziqalekise.
“Okwenza sithi nguye owababulalayo yikuthi phakathi kwamabizo la awaqambayo womahlanu ukuthi uNkszn Nyathi wayethi ewakhulukele ukuze bengamthatheli isikhundla sokuba ngu-advisor esigabeni abane bakhona sebafa.
“Kwabhubha uThokozile Songo, uMinenhle Zikhali, uNokuthula Ndlovu, loTalent Moyo kwasala uNkosazana Silibaziso Msipha,” kulandisa uMnu Ngwenya.
UNkosazana Thabitha Nkomo oyisihlobo sikamuyi uNkszn Nokuthula Ndlovu uchaze ukuthi kabalankani ukuthi umfundisi lo ulesandla ekufeni kukadadewabo.
“Ngizwa ubuhlungu ngokufa kukadadewethu ngoba besilokhu singazi ukuthi wabulawa yini. Kodwa nxa sesisizwa kuthiwa wabulawa ngabantu kuvuka amanxeba akudala, siswele ukuthi senzeni,” kutsho uNkszn Nkomo.
Ebuzwa ngale indaba uNkszn Nyathi uveze ukuthi abantu bayamzonda yikho bemqambela amanga.
“Kangazi ukuthi abantu balapha bangizondelani baze bangigcone ngento embi kangaka. Engikwaziyo yikuthi ngahambisa amabizo ezakhamizi ezinhlanu njalo nguye umfundisi owangiphurofitha wathi ngiwalethe awakhulekele ukuze bengangithatheli isikhundla sokuba ngu-advisor wakulesisigaba.
“Okunye njalo engikwaziyo yikuthi ngathi ngidlula ngaphandle komuzi kaNgema ngaqunta utshani ngabuthwala ngezwa sokuthiwa bengisenzela ukuthakatha uNgema lemuli yakhe khonapho mina ngibuquntile nje,” kutsho uNkszn Nyathi.
UNkszn Nyathi uqhubekele phambili njalo wachaza ukuthi umfundisi lo umbangisa ukuthi wala ukumbhadala yena wayemgcinele inkomo yakhe.
“Okwenza umfundisi angizonde yikuthi ngangimgcinise inkomo kagogo wami sivumelane ukuthi uzabe ethatha umquba wayo kwathi ngemva kwesikhathi wathi kasawufuni umquba sefuna imali. Sahamba emapholiseni afika athi ngingamniki lutho kangithathe inkomo kuphela, wahle wangizonda.
“Okokuthi sasithandana wangikhanda lenye indoda ngamanga,” kuchaza uNkszn Nyathi.
UMthunywa uvakatshele emzini kaMfundisi uMoyo wafica kungelamuntu kodwa wenelise ukukhulumisana lonkosikazi kamfundisi lo uNkosazana Sibonile Ncube othe ebuzwa ngale indaba wavuma ukuthi uyayazi njalo isathoniswa kusobhuku.
“Kuliqiniso ukuthi uNkszn Nyathi waletha amabizo ezakhamizi kumkami ethi kawakhulekele abaqalekise kodwa kazange wawakhulekisa. Ukuthi umkami nguye owabulala abanye balaba abalamabizo la ngamanga njalo indaba le isakhulunywa kosobhuku. Ngokubona kwami izadlulela kumlisa,” kutsho uNkszn Ncube.
Umkhulu wabosobhuku bakule indawo uMnumzana Fanyana Mayisa ebuzwa ngale indaba uchaze ukuthi wayizwa kodwa wathi kabakhulumisane njengabomakhelwane.
“Ngiyakwazi ukuthi kulokuxabana phakathi kwezakhamizi zami kodwa kangithandi ukukhuluma okunengi ngakho yikho ngathi kabahambe beyokhulumisana bahlale ngokuthula,” kuphetha uMnu Mayisa.
