uMthunywa
SIKUVEZILE kuviki ephelileyo ukuthi imbongi lapha ikhuluma ngento eyesabekayo njengomlilo, umkhuhlane wengculaza i-Aids. Ngumqedazwe i-Aids yikho imbongi ikhuthaza abatsha ukuthi bengayideleli njengeminye imikhuhlane ehlaselayo kodwa yelapheke enjengomkhuhlane woqhuqho labobhelihaziya. Imbongi isebenzisa amazwi asetshenziswa ekwethuseleni abantwana ukuthi bengadlali ngento etshisayo njengomlilo.
Amazwi athi, “tshitshi nana!” siwezwa esetshenziswa ekwethuseleni abantwana ukuthi bengadlalisi umlilo ngoba uyatshisa. Imbongi ixwayisa abafana ukuthi bengagijimeli ukwenza izinto ezifanele abadala bona besakhula isikhathi sabo singakafiki. Imbongi ixwayisa abafana abasakhulayo ukuthi bengayibhemi ingidi yabadala ngoba labo bezaba badala. Igcizelela lesi sixwayiso ngesaga esithi, “ubude abaphangwa.”
Lapha itshela ontanga ukuthi bengagijimeli izinto eziphambi kwabo kodwa ababelesineke ngoba isikhathi sabo siyeza hatshi ukuba badala isikhathi sabo singakafiki. Abafana kuthiwa bengagijimeli ukuqomisa amankazana kodwa kabawekele aye esikolo, nxa bebizwa yilawo mankazana bengasabeli okutsho ukuthi bengavumi. Nxa amankazana lawo ebaphandla okutsho ukuthi bayabagabha ngothando bengakhangeli. Nxa kade sebevumelane lalawo mankazana kabajinge bale bathi bebephosisile, benze iphutha.
Lokhu imbongi ithi kabakutsho ngesaga esithi, “ngamalimi ezansi,” kusitsho ukuthi bebephosisile ekuvumeni kwabo. Imbongi ithi kabale ukuya emacansini lamankazana lawo benze lokho okwenziwa nguJosefa wasencwadini engcwele iBhayibhili yena owala ukuya emacansini lomkaFaro uPhothifa. Siyakhumbula ukuthi kumbali leyo uJosefa wala ukwenza lokho umkaPhothifa ayesithi kakwenze nxa wayethenjiswa inotho emangalisayo.
Iyasiphinda imbongi isixwayiso sayo esikhulu isithi, “Tshi! Tshi! nana! Nana tshi! tshi!” Khathesi-ke imbongi ixwayisa amankazana ukuthi engadlalisi imizimba yawo. Ithinta njalo iBhayibhili lapha esizwa khona ukuthi abantu kabayiphathe kuhle imizimba yabo ngoba ilithempeli likaNkulunkulu. Yonke into ethinta uMdali, uNkulunkulu iqakatheke kakhulu. Iyakhwaza imbongi itshela amankazana ukuthi engadlali ngemizimba yabo. Ibisiwabuza amankazana ukuthi bazabasangaphi abantwana labo bengabantwana.
Akulamntwana owenelisa ukugcina umntwana ngoba laye ngumntwana. Iyaqhubeka imbongi ixwayisa amankazana ukuthi engavumi ukuqilwa ngemali ngoba yona vele kuthiwa iyimpande yesono okutsho ukuthi ngenxa yayo imali abantu benza khona okubi befuna yona. Amankazana axwayiswa ukuthi angaqilwa ngeziwiji lamakhekhe ngoba bengabola amazinyo lemizimba yabo. Siyakwazi ukuthi abantu abathanda ukudla iziwiji lamakhekhe babola amazinyo.
Lapha imbongi ixwayisa abafana lamankazana ngengozi zokuya emacansini ukuthi kuzababolisa imizimba kusitsho ukuthi kuzabafaka imikhuhlane enjenge-Aids yona engelaphekiyo. Ipha isixwayiso esikhulu emankazaneni ukuthi bengaqilwa ngemota ngoba ithengwe ngesikwelede. Banengi abatshayela izimota kodwa belandelwa yizikwelede bayenge amankazana ayangekayo ngokuthanda izimota. Kusobala ukuthi imbongi iyamkhonza uNkulunkulu wayo.
Iyaphambili ibaxwayisa ontanga ukuthi baqaphele ingozi ngokuthi, “Tshi! tshi! Nana tshitshi!” Iyaphindaphinda imbongi ithi abantwana kabalalele abazali babo ngoba kulungile eNkosini, kungamazwi avela kuMtshumayeli eBhayibhilini.
