uMthunywa
Buhlebenkosi Gaule
IKHANSILI ebona ngokulotshwa kwemihloliso yemfundo yaphansi laphezulu kuleli, iZimbabwe School Examination Council (Zimsec) isiveze ukuthi amalungiselelo onke asenziwe okuthi ngomnyaka ozayo abafundi bahlalele imihloliso kaFomu 4 yolimi lwesiNambya okokuqala.
Isikhulumi seZimsec uNkosikazi Nicky Dhlamini uthe ikhansili yabo ikhangelele ukuthi abafundi abafunda isiNambya ebangeni eliphansi bazilungiselele ukubhala umhloliso wesiNambya ngomnyaka ozayo.
“UHulumende wavumela ukuba abafundi bafunde indimi ezitshiyeneyo kusiya ngokuthi bahlala ngaphi njalo lezo ndimi zivunyelwe kuye wonke umntwana owenelisa ukubhala imihloso yalezo ndimi,” kutsho uNkkz Dhlamini.
Uqhubekele phambili esithi okwakhathesi abafundi bebanga eliphezulu babhala imihloliso yesiNdebele, isiShona, isiTonga kuthi laba abebanga laphansi babhala imihloliso yesiNdebele, isiShona, isiTonga, isiShangane, isiNambya, isiVenda kanye lesiKalanga.
“Kungakho abafundi kumele baqhubekele phambili ngendimi zabo abayabe bezifundile babhale imihloliso.
“Ikhansili yeZimsec iphakathi kwemizamo yokubona ukuba indimi ezifundwa ngabafundi bebanga laphansi bayaqhubeka lazo kubanga laphezulu ngakho ngokuya kwesikhathi abafundi bazakwenelisa ukubhala imihloliso yezinye indimi,” kutsho uNkkz Dhlamini.
Lokhu kusekelwe nguMphathintambo wezemfundo yaphezulu leyaphansi (Primary and Secondary education) uDokotela Lazarus Dokora ngesikhathi ekhuluma ePhalamende.
“Abafundi abazabhala umhloliso wolimi lwesiNambya okokuqala lonyaka bakubanga lesithathu kumfundo yaphezulu ngoba sokulungiselelwe ukuba baqalise ukubhala umhloliso wolimi lolu,” kutsho uDkt Dokora.
