uMthunywa
YiNtatheli kaMthunywa
KULOMBALISI weGwanda omiswe phambi komthethwandaba wakule indawo esetheswa icala lokubhaxabula umkakhe ngemva kokukhandwa elomakhwapheni.
Umsolwa uNjabulo Ndlovu oleminyaka yokuzalwa engu-36 ongumbalisi esikolo seGwanda High umiswe emthethwandaba kuviki ephelileyo esetheswa icala lokubhaxabula unkosikazi wakhe uSenziwe Mafu oleminyaka yokuzalwa engu-33.
Inkundla izwe ukuthi mhlaka 5 kuyonale inyanga umamangala wafica umsolwa elomakhwapheni wakhe endlini yabo engakapheli ukwakhiwa eMatshetsheni.
Umtshutshisi kulelicala ubikele inkundla ukuthi umsolwa ebona umamangala wakhiyela umakhwapheni wakhe endlini esenzela ukuba uMafu engakhulumi lomakhwapheni lo andubana amqonde wafika wamtshaya waze wamwisela phansi.
Kubikwa umsolwa eqeda kutshaya umamangala wathatha umakhwapheni wakhe bangena emoteni batshaya utshani batshiya umamangala elele phansi engasenelisi ukusukuma waze wancedwa ngabantu ababedlula abamhambisa esibhedlela ngoba elimele.
Igqwetha likaNdlovu, uMnumzana Thompson Mabikwa ucele ibheyili ngoba umsolwa esemsebenzini.
Umtshutshisi uMnumzana Takunda Mafudze ukwalile lokhu wathi ababili laba bahlala ndawonye njalo kungenzeka umsolwa atshaye umamangala futhi.
Incwadi kadokotela ichaze ukuba umamangala walimala kakhulu emgogodleni njalo kesenelisi ukuhamba kuhle.
Umsolwa uphiwe ibheyili ye$150 njalo icala leli lizaphinda lithoniswe mhlaka 23 Nhlangula.
Umantshi kulelicala bekunguMnumzana Maphios Moyo.
