uMthunywa
Buhlebenkosi Gaule
KULENDODA yakoBulawayo ezokhele amalahle ekhanda ngokudala icala lokuxotshanisa abantwana ekhiphe isitho sakhe sangasese phandle kwebhulugwe.
Umsolwa uNorman Sivango oleminyaka yokuzalwa engu-38 njalo ehlala elokitshi lePumula South koBulawayo umiswe phambi kwenkundla yeWestern Commonage kuyonale iviki esetheswa icala lokuziveza ubunqunu ebantwaneni ababezihambela.
Umantshi walelicala uMnumzana Themba Chimiso umgwebele ukuyahlala entolongweni okomnyaka owodwa ngenxa yecala lakhe.
Umtshutshisi walelicala uMnumzana Stewart Madzore ubikele inkundla ukuthi mhlaka 12 Mbimbitho lonyaka amantombazana amabili ayizelamani ayesegangeni eliseduzane lenkonzo yeEnd Time Messages ePumula edobha amaphepha kanye lezigubhu ezilahliweyo ukuze ayebasa umlilo.
“Amantombazana la aleminyaka ethi (10) le (12) ayezidobhela amaphepha lezigubhu egangeni eliseduze lebandla leEnd Time Messages khonangale ePumula ngesikhathi umsolwa ethutsha.
“Ngokutsho kwabantwana laba umsolwa wavela egangeni leli ekhiphe isitho sakhe phandle kwebhulugwe njalo esibambile wahle wathi amantombazana la asiphulule isitho sakhe.
“Abantwana laba abahle babona ukuthi basebebhekane lengozi bahle bacela ezinyaweni umsolwa laye wahle wabagijimisa isitho sakhe silokhu siphandle.
“Kubikwa abantwana laba bagijima ngesiqubu esikhulu baze bahlangana lamanye amajaha ayezihambela okwahle kwenza umsolwa wabaleka ebuyela egangeni,” nguMnu Madzore lo.
Amajaha la abikelwa ngesenzo sikamsolwa ahle angena iganga emdinga amgijimisa aze ambamba amusa emapholiseni. Umsolwa uthe ebuzwa ngumantshi ukuba kungani wenza lelihlazo ebantwaneni waphendula ngokuthi kazi ukuthi wayengenwe yini.
