uMthunywa
Cornelius Luphahla
ZIHLEZI ziphethe izibindi ngezandla izakhamizi zeCowdray Park nanko phela akusahanjwa ebusuku ngenxa yezigebenga ezigamula abantu abahamba ebusuku ngamahloka njalonje.
Udubo lolu kubikwa sokulesikhathi eside lwaqala nanko phela lonyaka sokuganyulwe abantu abedlula isithupha kusukela enyangeni ezimbili ezedluleyo kodwa izigangi lezi kazibonakali.
Kunyanga ephelileyo iphephandaba likazulu like lakhipha udaba lwezithandani ezahlahlelwayo zincinda uluju lwemvelo kulelilokitshi.
UMthunywa uxhumane lesinye isakhamuzi sakule indawo uMnumzana Edwin Nkomo wachaza ukuthi izigebengu lezi sezilesikhathi eside zaqala ukubakhathaza njalo sezilimaze abantu abanengi kakhulu.
“Izigebengu lezi ziqale ukukhathaza lapha kumnyaka ophelileyo. Ngikhuluma nje ngemva kokugamula uTooboy Shereni lo Bongiwe Sibanda emavikini amathathu adluleyo seziphinde zagamula abantu abahlanu. Into esuka isidanise yikuthi noma usuziphile imali yonke oyabe ulayo ziyakugamula kuphela.
“Kuviki ephelileyo zigamule indoda lomkayo kanye lomntwana abebevela enhlane ukuyakhuleka. Kunjalo kazibathathelanga lutho zibagamulile nje kuphela baze bayasilela esibhedlela seMpilo,” kuveza uMnu Nkomo.
UNkosazana Tendai Chakanyuka oyisakhamuzi sakule indawo ubikele intatheli ukuthi bahlala bezibika emapholiseni kodwa kazibanjwa.
“Izigebengu lezi ezigamula abantu sihlala sizibika emapholiseni kodwa lokhe zingakabanjwa njalo kathesi sezihlasela abantu ilanga litshona. Okubuhlungu yikuthi akula enye indlela esingahamba ngayo nxa sivela eterminus kumbe esigayweni ngaphandle kokuquma esifuleni esikule indawo okuyikho abantu abaganyulelwa khona,” kutsho uNkzn Chakanyuka.
UNkzn Chakanyuka uqhubekele phambili njalo wachaza ukuthi laye izigebengu lezi zaphosa zamgamula.
“Mina ngisile ngokuhambisa kuviki ephelileyo ngoba izigebengu lezi zathi zigamula omunye umama mina ngangiphambili kwakhe ngagijima kakhulu ngibaleka. Umama lo zamgamula zamthathela imali kanye lempahla ayezithwele. Ngikhuluma nje lakhathesi lokhu elimele noma sowaphuma esibhedlela,” kulandisa uNkszn Chakanyuka.
Ebuzwa ngale indaba uKhansila wakule indawo uMnumzana Collette Ndlovu uchaze ukuthi indaba le eyezigebengu lezi useke wayizwa noma nje ubengakezwa ukuthi iyaqhubeka.
“Indaba yezigebengu esezihluphile koHawkflight ngiyizwe kumnyaka ophelileyo lezo zigebengu ezazigamula abantu zabanjwa. Okunye njalo engike ngakuzwa yikuthi kulezithandani ezaganyulwa zisexukwini esifuleni ngathi mhlawumbe baganyulwe lijaha likantombazana lo owayelalo ujaha abaganyulwa bonke.
“Ngalokhu ke nxa kuyikuthi izigangi lezi ziyaqhubeka kutsho ukuthi zinengi ngakho ngizadingisisa ukuthi kungabe kuhamba njani besengibikela amapholisa njengoba nje sesangezelelelwa inani lamapholisa kulelilokitshi ngenxa yokwanda kwezigangi,” kuphetha uKhansila uNdlovu.
